December 30, 2006

اضحية العيد السنادي ... !!



كل سنة وانتم طيبين
ويارب يعدي عليكم عيد اضحى سعيد ملئ بالتفائل والامل والاشراق والبسمة وكل كلام الانشا اللي التلفزيون هارينا بيه
:(
اما بالنسبالي فانا العيد عندي بايز اساسا عشان موجة المشاريع والامتحانات
وحاليا هو مش عيد اساسا عشان الخبر اللي اتصبحت بيه النهاردة وهو اعدام صدام حسين !!
اضحية العرب
مهما عمل وفعل وانا ياما سمعت عن جبروته ومهما كنت مقتنعة ان دي نهاية مأساوية لحاكم طاغية بس ليا وقفة في ميعاد تنفيذ الحكم
سؤال؟؟
هل صدام حسين اضحية العرب للعيد السنة دي؟؟
حد يقولي لأ
ماهو ميعاد تنفيذ اعدامه ان دل فيدل على انه خروف العيد السنادي !! للدرجاتي هما بيكرهو وهما دلوقتي مبسوطين في عيدهم ان صدام حسين مات ولا ده فرمان امريكا تم توجيه لكلاب العراق لتنفيذ حكم الاعدام ويبقى العراقين هما اللي اختاره الوقت
حد يفهمني ان في مسلم النهاردة بيقضي عيده عنده السعادة التامة لتنفيذ حكم اعدام
والله لو سفاح بني مزار ماحرضى انه يتعدم النهاردة
بلاش عشان مشاعر المسلمين اللي بيعيدو رغم كل الهم اللي حواليهم
عشان اهله طيب ، يعني بجد مافيش اي دم بالمرة
في الاخر ليا كلمتين حقولهم
اولا:انا يوم التلات الموافق رابع ايام العيد مش حدخل نت خالص وده مش وقفة حداد لروح صدام لأ دي وقفة حداد على روح العرب اللي قابلة الذل وساكتة
اعتبروه اضراب عن الكتابة مثلا وعن اي تعامل بالنت
ثانيا : كلمة ااقولها لكل البشر وخاصة حكامنا العرب
(اذا دعتك قدرتك على ظلم الناس فتذكر قدرة الله عليك)
نهاية طاغية عربي في يوم عيد المسلمين

December 28, 2006

والنار لسة قايدة تحتك يارماد


تحديث : اللينك موجود عند انا مين في مدونة اي كلام عشان ماحدش يزعل بس :)

بصراحة كدة انا مش عارفة ابدأ ازاي بس انا حتكلم وزي ما الكلام يجي بقى ...:)

امبارح وانا قاعدة بتكلم مع الناس على النت اتبعتلي لينك لفيديو على فيديو جوجل (بس مش حديهولكم ) عشان هو في جزء كبير من السفه والاسلوب الغير مهذب بس ححكيلكم عليه كدة بأختصار

عبارة عن بعض الصور للطبقة الحاكمة (من غير توضيح ربنا يجعل كلمنا خفيف عليهم ) معمول عليها مونتاج وتركيب للصور مع عبارات ان دلت من الظاهر دلت على نوع من السفالة ولكن بداخلها رغبة عارمة في التغير


التركيز الاول اتحط في موضوع التوريث وواضح ان الموضوع ده بقى شاغل اغلب الفئات في الشعب حتى ولو الحكومة انكرته لكن واضح انه خلاص الناس بقت مستنية ان الدستور يتعدل اليومين دول ويطلع عليهم الخبر( نبشر الشعب المصري بتغير الحكم في الدولة من جمهوري الى الملكي ) بس للأسف ساعتها مش حنعمل زي بعض الدولة اللي جانبينا ومش جانبينا ومش حنهلل كالعادة

تاني حاجة اتركز عليها الفيديو هو موضوع الحكومة وان الناس قعدت على كراسيها لغاية لما خللت واحتمال يعمللوهم تماثيل :) يعني بجد حاجة بقت غريبة الحكومة بقت بتلعب لعبة الكراسي الموسيقية بتاعت زمان لو مش فاكرنها افكرهلكم يعدو يلفو الاغنية ولما تخلص اللي يلحق يعد يعد واللي مايلحقش مع السلامة بس مازالت الناس اللي بتلعب هي هي ... ربنا يهدي ويتغيروا

الفيديو وبرغم رداءة صنعه ورداءة تلفيق الصور واستخدام الفاظ بذيئة والتشبيهات الاغرب بس بجد دق ناقوس الخطر


حتى فئة اللمبي وسعد الصغير والعمدة فاقت مابقاش بس المثقفين هما اللي بيتكلمو في السياسة لأ بقى كل الشعب (مع اختلاف طريقة التعبير) حتقولولي ازاي يا طمطم حقولكم ازاي ...صلو بينا على النبي


فئة الناس المثقفة كلنا عارفنها بتطلع في التلفزيونات وبتكتب في الجرايد وبتعمل مظاهرات وبتقول بالبق المليان (سيبو البلد ..) صحيح بيتاخدو معتقلاات وسجون بس مش دي القضية دلوقتي


فئة الناس الغلابة بقى من طبقة شعبولا واللمبي بتخاف من الحكومة، الناس دي بتعدي على الاقسام زيي مابتعدي على افران العيش الصبح فعارفين البهدلة وطبعا متربي جواهم خوف من حاجة اسمها قضايا امن الدولة ان ماكنش اتولدو بيه (وطبعا احنا مازلنا في طوارئ ..فأي كلمة بقت قضية امن دولة :) ) المهم انهم خلاص اتملو وانفجروا طب ها يعني مش حيتكلمو ،لأ طبعا حيتكلمو بس من غير ماحد مايمسكهم (والله اذكية ) فعملو الفيديو ده ونشروه على النت لعل وعسى صوتهم يوصل طبعا استخدمو اسلوبهم في السب والشتيمة والتصوير والتشبيه البليغ (في بعض الاحيان ) والغير بليغ بس اهو تشبيه وخلاص بس لازم نعترف ان دي بئيتهم وهما طفحوا الكيل والناس اللي بالي بالكم لو مش بتستخدم اساليب زبالة معاهم ماكنوش ردو بنفس الاسلوب الزبالة


طب بطلي رغي وقولي عايزة تقولي ايه ؟؟


انا عايزة ااقول كلمتين ( قاعدين ليه ماتقومو تروحو ) و ( كفاية حرام ) ياجماعة تعبنا ، تعبنا من نفس الوشوش اللي خلصت كل اللي عندها ومابقاش عندها حاجة خلاص تقدمهالنا وقاعدين يكملو اكل و برطعة وعلى نظام (اهي بلد ابويا وولادي بعدي) وبس خلاص

يعني استفسار بيحل على دماغي كدة قبل ماانام اختم بيه قعدة الرغي دي ..هو احنا لازم رئيس دولتنا يموت على كرسي الحكم ؟؟

مستنية الاجابة ... :)


نسيت ااقولكم


الاغنية المصاحبة للعمل ( بحبك يا حمار ).....سلاموز يابشر

December 27, 2006

انا زهقت





بصو مش انا لسة عملة البلوج ده امبارح بس بجد زهقت
مش بعرف ادخل لفة سودة عشان اعرف ادخل
الله ياخد الفلسفة الزيادة
ملها الباسوردات العادية يعني كان لازم اعمل باسورد حروف كبيرو صغيرة وارقام كمان
على رأي واحد اعرفه هوحيعترف بنفسه ويقول انا:
ماكنش بلوج البيت الابيض عشان كل الباسورد ده
على العموم انا قعدت اعصر في الجمجمة مابتجيش الباسورد
وكل مااحب ادخل اعمل لفة طويلة عريضة وادخل
بس بدخل :)
بس ياترى المشكلة فين ؟؟!
اني عملت باسورد كبير ووالله فاكره ومش راضي يخش؟

ولا كان المفروض اعمله عادي من غير فلسفة ؟؟
على فكرة المشكلة دي مش بس في البلوج ساعات في اميلات عندي مش يفتحها بسبب نفس المشكلة ؟ وفي منتديات؟؟

شورو عليا يا جدعان؟؟ ساعدو مدوناتية لسة في بداية حياتها المدونتية :(


ده انا بفكر اعمل واحد جديد بسبب كدة:((


December 26, 2006

سمي وخش برجلك اليمين...:)

بأسم الله حبتدي النهاردة اول يوم ليا في عالم المدونات وبأمانة تذكر انا ولا اعرفه ولا جربته قبل كدة بس عجبني فكرته اوي ، عالم حكتب فيه اللي يمليه عليا ضميري وبس ، من غير حد يقولي اكتبي وحد يقولي ماتكتبيش .....:)


المهم يا اخواتي احب في الاول كدة ارحب بيكم وافرشلكم الارض ورد انكم شرفتوني في بيتي اللي حرغي فيه براحتي (اصلي عندي هواية اسمها الرغي بعيد عنكم ) المهم احنا حنتكلم في كل حاجة مواقف حصلتلي اوك ، حصلتلكم ماعنديش مانع برده تكتبوها ، نتكلم في الفن مش مشكلة نفن سوا ولا يهمكم بس ابعدونا عن الرقص :) ، عن الرياضة والله مافيش مانع ، واهم حاجة عندي طبعا السياسة :)) ده انا حهريكم سياسة للركب بس اصتبروا عليا لما افوق .....


ويلا بقى عايزة امشي اروح اكتبلكم حكايتين لذاذ كدة نبتدي بيهم قعدتنا النهاردة


سلاموز يا بشر