عندما يبدأ احد بالخروج من { حياتك }
شيئا فشيئا
فتأكد ان الله يخلق مساحه جديده
لشخص >> افضل << ليحل محله
فشكرا للذين خرجوا من حياتي__وشكرا لله اولا واخيراا وابدااااا
_______________________________________________
الكلمة دي صاحبتي كانت كاتباها على الفيس بوك
اد ايه جميلة ومعبرة وجواها ذكريات كتير
فعلا شكرا لكل من خرج من حياتي ليترك مساحة لشخص افضل منه
وبنفس المنطق
شكرا لخروجي من حياة اي شخص .. لأترك مساحة لشخص افضل مني الف مرة لدخول حياتهم
نركز بقى في الشعار ده ونبطل نلف وندور حوالين حاجة تانية
معظمنا قرا عن الثورة المضادة
في دلوقتي مواضيع مطروحة على الساحه وبشدة
الا وهي
المادة التانية ... وائل غنيم
مبدأيا بعد حوار مع صحابي حبايبي وبعد تفكير مليا
دي اخر مرة اتكلم في الموضوع ده تاني
المادة التانية
واحد : ده مش وقت الكلام فيها خالص
اتنين : ححتفظ برأي الخاص في الموضوع ده
تلاتة : ده المهم بقى .. الثورة ماكنتش بتتكلم لا في مسيحية ولا اسلامية .. امتى ظهر بقى الحوار بتاع المادة اللي حتتغير دي؟؟!!.. مش واخدين بالكم ان معادها صعب شوية .. الحمد لله المسلمين مع المسيحين ماكنش في بينهم اختلاف في وسط الميدان.. كلنا شفنا المسيحين وهما بيحمو المسلمين وهما بيصلو.. كلنا شفنا المسيحين في عظتهم والمسلمين بيامنو وراهم
ايه بقى اللي حصل فجاة!!.. مش واخدين بالكم ان ده تخطيط للتوقيع بينا تاني .. احنا في مرحلة حرجة .. اي كلام في الدين حاليا دي لعبة النار
وبردو احب اذكر ملاحظات صحابي حبايبي
كان في استفتاء في الاهرام حول المادة التانية .. اشمعنى الاهرام ... اشمعنى سرايا
وفي فيديو عن احد المنتديات الدينية وهو بيزور نتيجة الاستفتاء دي عن طريق تغير الاي بي
مش عايزين ننادي بسقوط الفساد ونقع احنا فيه عشان غرض في دماغي
ارجوكم حاولو تكونو صادقين مع نفسكم اكتر من كدة
نرجع تاني ونقول مش وقته
كمية الجروبات الغريبة لا للمادة التانية .. لا للمساس بالمادة التانية
مش قضيتنا .. ماتسيبوش الاساس وتمسكو بالافرع
خلينا كلنا نتحد زي ماكنا متحدين في 25 يناير ونقوي الاساس .. عشان نقدر يبقى عندنا الحرية ان احنا نختار صح
حنمسك في الفروع حنكسر الاساس
ركزو الله يخليكم
الموضوع التاني .. وائل غنيم
اختلفنا او اتفقنا معاه
لازم نفهمان فكرة تشخيص الثورة في وائل غنيم بيضعفها جدا
بمعنى
لو احنا مؤيدين للثورة بس شايفين ان اللي قومها وائل .. اي غلط في وائل بيتحول لا اراديا في دماغك لتشكيك في الثورة
بمعنى
الثورة مش وائل غنيم ... الثورة مش كلنا خالد سعيد
هل هو ركن من الثورة .. لأ .. تقدر تقول عليه عامل جمع الشباب
لكن الناس اللي تحت في الشارع ماكنوش الشباب بس
ناس محترمة جدا كانت مؤيده للثورة مالهاش علاقة لا بوائل ولا الفيس بوك
ركزو تاني في اساس الثورة ... سيبو الفروع لو سمحتم
تاني حنقول
عيش ، حرية ، كرامة انسانية
طيب لغاية دلوقتي احنا مشينا حسني مبارك .. حلو جدا
كلنا حاسين بالكرامة الانسانية
طيب العيش والحرية
لسة ماجوش
حيجو ازاي ؟؟
ده رأي المتواضع .. اتفقتم معه ام اختلفتم خدوه بصدر رحب
ممكن نفوق بقى .. احنا حققنا نص مطالبنا ..والجزء الاصعب في ثورتنا
فاكرين ثورتنا بدأت بأيه؟؟
عيش - حرية - كرامة انسانية
ماتنسوش يا جماعة مطالبنا احنا عايزين نعمل اصلاح
شيلنا راس الفساد ؟؟!!؟ شاطرين .. ده نص الطريق على فكرة مش كله ؟
انا عارفة ان ده انجاز .. بس احنا داخلين في اسبوع واحنا مازلنا مبسوطين وبنلعب .. وقت الجد على فكرة جه
فكرة بقى نتشتت في حاجات ملهاش لزمة يا ريت نتجاهلها
ده احسن طريق لمحاربتها
اهم حاجتين اخدت بالي منهم ..
وائل غنيم والحدوتة اللي وراه .. من الاخر عشان مش عايزة اتكلم في الموضوع ده كتير
الراجل مليون مرة قال هو مش بطل .. مانجيش احنا نعمله بطل بالغصب ونشكك في بطولته .. ماهو قال هو مش بطل من الاول
شاب زينا كلنا .. بيضحك مع صحابه وبيتريق وبينبسط وبيرقص وكل حاجة احنا بنعملها
فكرة الماسوني دي بتضحكني .. اللي حيكلمني فيها يكون متفرج على سلسلة القادمون كاملة من 51 حلقة على اليوتيوب ويجي يكلمني في الماسونية .. عشان يكون فهم فيها وفي لعبتها نقطة في بحر
اسألوني عليها انا في الحوارات دي من اكتر من 5 سنين في الماسونية والصهيونية واليهودية وكل الكراكيب دي
شعار الاسد متواجد بكترة جداااااااااااا واشهر حاجة في مصر منها ماركة البيجو ... فبطلو بقى .. مش معنى ان الراجل نضيف وبيلبس ماركات يبقى عميل .. الحظاظة .. دي اسورة المطاط ومشهورة وعالمية جدا .. وكل لون ليه معنى .. واللي لابسها معناه ( الحفاظ على كوكب الارض ) .. واللينك اهو rubber bracelets
متجوز امريكية .. نعم!! .. ماكل شباب مصر عايزين يتجوزو واحده امريكية وتكون شقرا وعنيها زرقا !!.. يطلقها عشان ترتاحو .. شغال في جوجل وجوجل مش عارف بتعمل ايه على الترجمة!!.. وهو ماله؟؟ انت موظف في شركة .. ايه علاقتك بسياسة الشركة .. يعني اروح لصاحب الشركة ااقوله انت يهودي مش حشتغل معاك .. ده على كدة نص مصر مش حتشتغل .. معظم شركات الانترناشيونال الملاك يهود !!.. اولهم بيبسي وكوكاكولا وماك وكنتاكي .. كل اللي بيشتغل فيهم عملا بقى !!
كفايا اوي اوي اوي .. زودته فيها جدا ... والناس كفت ووفت صراحة في الاعتذار
طب وبعدين ؟؟
خلصنا الثورة ؟؟ .. لأ طبعا ورانا شغل كتير... مين بدأ الثورة؟؟ شباب الفيس بوك .. حلو جدا .. شباب الفيس بوك الحمد لله واعي وبدأ ينزل بنفسه ينضف الشوارع و يعمر ويحاول يحسن سلوك الناس حواليه وكل ده جميل بس احنا كدة عملنا تلات اربع ثورة فاضل ربع .. احنا موقفين البلد !!
مين موقف البلد طيب؟؟
الناس اللي كانو خايفين ولما لقو ان اسلوب التظاهر نجح وشال مبارك قالك بس نتظاهر عشان نحسن معيشتنا !!.. نعم يا بابا .. لما البلد النهاردة محتجاكم حتوقفوها؟؟.. الكلام ده كان من شهرين ماشي النهاردة نوقف الاسلوب ده ونبتدي ناخد حقنا باسلوب جديد .. عايزين ننزل نشتغل .. عايزين الحياة ترجع
طبعا انا عارفة ان الناس اللي حتقراني اغلبها مالهاش بالمواضيع دي .. طب نعمل ايه .. ننشر الكلام ده لو عاجبك .. انشر باسلوبك .. انشر في كل مكان حملة لتوعيه الناس باي حد له اهله في حاجة زي كدة يوعيهم
طب ليه ؟
اولا الثورة دي رفعتنا في الامم .. مش عايزين بردو بثورتنا ننزل تحت!!.. لازم نبني مش نهدم . الاقتصاد حيضيع مننا مش حنلاقي ناكل .. فكرة ان احنا ناخد الفلوس اللي برا ونوزعها والعيشة البمبي دي مش نافعة
الفلوس دي عقبال ماترجع وتشتغل في السوق وتجيب فوايدها.. ولا خمس سنين
ثانيا .. عندنا قطاع اسمه السياحة اتقفل تماما .. عايزين حملة للسياحة سواء داخليه او خارجية .. احنا بلد قايمة على السياحة
ثالثا .. اصلاحنا مش بيوم وليله .. ده على الاقل خمس سنين عشان نبتدي نحس.. ماتتصدموش لو لاقيتو حد يسرق ويرتشي وبيعاكس وبيرمي زباله على الارض ..احنا نحاول نصلح من نفسنا ومن اللي حوالينا وان شاء الله واحده واحده حنبقى ام الدنيا تاني
رابعا .. اللي يعرف حد يكلمه .. اللي عنده قدرة انه ينزل لحد الناس ويتفاهم معاهم ماشي.. مش عايزين كل الدنيا تقف مش حنلاقي ناكل يا بشر
رابعا .. ماتشمتوش فينا الاعادي..يعني انتو عارفين ان في اعداء للثورة دي كتير.. منهم صحابنا مثلا.. حيقولك بس.. شفتو بابا حسني كان معيشكم منغنين ازاي .. لأ احنا عايزين نثبت ان احنا احسن
اخيرا نداء لكل اللي يعرف حد يفهمه ان الاعتصامات حاليا مش صح .. احنا في ظل وجود حاكم عسكري.. لو حب يعتقلنا كلنا حيعتقلنا .. راعو المبدأ ده .. القوات المسلحة عماله تناشد الناس تساعدها...ساعدوهم يا جماعة
بس الاول لو من مؤيدي مبارك ومحبيه اطلع برا مش عايزاك تقرا البوست اصلا
مابتحبهوش ومنقسم حول بقائه وعدم وجوده تعالى نتكلم ونحللها مع بعض
أولا للديموقراطية حبتدي بوجهات النظر الاخر
ماتهينوش رمز مصر
اهو ده بقى بيفرسني اكبر فرسة عشان كدة قلت ابتدي بيه... واحد طالع يقولي اللي بيهين رمز مصر بيهين مصر... والله انا ماشفتش سمعة مصر بالجمال ده في العالم كله غير اليومين دول .. لو مش مصدقني روح بص كل كومنتات العالم علينا .. ده انا كنا بنتشتم عيني عينك مابنعرفش نرد .. يتقالنا يا عملا يا خونة يا مؤيدي اسرائيل نقلهم دي الحكومة وماتاخدوش المصريين بذنبهم .. كنا بنديهم الغاز وسايبين غزة في ضلمة .. ده ابونا حد يهين ابوه ده الرسول وصى على الشيخ الكبير.. ابويا نايم جوا مالكش دعوة بيه .. والرسول لما وصى على الشيخ الكبير مارحتش تتشطر على الحكومة وتقلها كدة في وشها ليه .. ماالناس كانت بتتسحل في الارض ماحدش قال ده كبير ولا صغير .. كان البياع بيتاخد منه حاجته ويتبهدل ماحدش قال ارحموه ليه .. كان بيتاخد منهم عيالهم مابيعرفوش ينامو الليل.. لما عربيات الامن يوم الجمعة اللي فاتت بقت تجري تدخل في الناس ماقلتلهمش كدة ليه ؟؟ اللي حيقولي ليس منا من لم يرحم صغيرنا ويوقر شيخنا حقوله الرسول قال : ( الراحمون يرحمهم الرحمن ارحموا من في الأرض يرحمكم من في السماء الرحم شجنة من الرحمن فمن وصلها وصله الله ومن قطعها قطعه الله ) رواه الترمذي
لازم يخرج خروج مشرف
على ايه ؟؟ .. مانت تقولي ليه بردو .. حتقولي صاحب الضربة الجوية وصاحب اعظم الانجازات .. اللي من فلوسنا وضاريبنا ولا كانت من جيب اهله؟ طب حسيبك مع لينك تقراه وتعرف انجازاته
"هذه المرة، أنت تعلم بأن شعبك كان يُقتل ويُهان ويُقمع ويُسحل فى شوارع مصر، إذا لم تكن قد أمرت بذلك فلابد أنهم نقلوا لك ما حدث فى التقارير، وإذا كانوا لم ينقلوه لك فلابد أنك شاهدته فى الفضائيات والصحف المصرية العربية والأجنبية التى قاومت قمع أجهزتك ونجحت فى تسريب بعض الصور بعيدا عن أيدى رجالك، إذا كنت تعلم فتلك مصيبة، لأنك خالفت ما أقسمت عليه بالحفاظ على أمن وسلامة المواطن، وإذا كنت لا تعلم فالمصيبة أعظم، لأنك عندها لا تستحق أن تكون رئيساً لنا."
عملاء واجندات خاصة
انا مش حنكر ان مصر مستهدفة والله .. ماهي مصر يا جماعة .. بس بصراحة احنا كنا مستهدفين الاول اكتر .. لييييييه .. ااقولكم .. فاكرين الشباب السيس اللي كان اهم حاجة عندهم جوزيه حيجي الاهلي وماتش الاهلى والزمالك وشاكيرا حتيجي مصر ولا لأ ومين سوبر ستار الشباب تامر ولا عمرو؟.. الشباب ده كان ممكن تهاجمو بمنتهى السهولة .. اقولك حاجة .. احنا في اعلى معدلات الوطنية والانتماء للبلد دي مش واخدين بالكم ان احنا كلنا بنتكلم في السياسة وكلنا خايفين بجد على مصلحة البلد ولو باختلاف وجهات النظر الناس اللي بتنزل تتظاهر وهي مش خايفة من رصاص .. حتدافع عن بلدها من اي كلب يحاول يدخل حياكلوه حيي اصلا .. دول مرعبوين منا الله يهديكم عشان كدة بيحاولو يكونو معاكم .. لما قلنا يتنحى وافقتو ولما الناس شافت اصراركم كلهم دلوقتي بيقلوله امشي.. عشان عارفين انه خلاص انتهى وبيضحو بيه في سبيل ارضاء الشعوب .. بقت كدة تدخل في شؤون مصر.. ماحدش حيقدر يدخل مصر ويتدخل في شؤونها .. بس هما مش حيقفو ساكتين اكيد ليهم موقف عشان دي مصر.. لو مع الرئيس حيخسرو البلد لأن الاوطان باقيه والافراد زائلون .. اجانب في المظاهرات واسرائيلي في السويس .. اولا لااجانب في كل حته في مصر.. ولا انت مش واخد بالك ان احنا اصلا بلد سياحي والاسرائيلين طول عمرهم بيتفسحو في البلد من اول طابا لحد مولد ابو حصيرة .. مش حقول مش حيدخلو بقى وينظمو جواسيس .. ده دور المخابرات و الجيش .. حتقولي البنت اللي طلعت في المحور حقولك هي اصلا امريكا واسرائيل حتقلب نظام الحكم ليه اذا كان اصلا موالي ليها ؟ اه تدرب عيال يتجسسو على اجهزة امنية زي المخابرات والجيش ماشي .. اسرار عسكرية اوك .. انما يشيلو صاحبهم جارهم حبيبهم .. ياخي ده احنا كنا بنتحاكم بعقوبة التحريض على دول صديقة .. ماتفوقو بقى واسيبكم مع فيديو بردو لبلال فضل بيتكلم فيه عن البت دي
والناس حتيجي تقولي الجزيرة وقطر ووثائق ويكليكيس .. منا قلت قبل كدة حد يجيبلي الوثائق ويبطل يردد .. ثانيا في فيديو على اليوتيوب من ايام زمان بيتكلم عن الموضوع ده .. ان في تعاون ما بين قطر واسرائيل مااعترضتش انا .. بس انكر تعاون مصر مع اسرائيل الاول.. انت كانك بتقولي الحق فلسطين بتتعاون مع اسرائيل.. ياابني ماكل الدول العربية بتتعامل معاهم اصلا
ثانيا يوم الجمعة اللي فاتت وقت الصلاه كنت فاتحة الجزيرة والعربية والحرة كانت بتنقل من ميدان التحرير والناس كلها معانا .. قلت ابص علىا لارضي
الاولى كانت واحده بتتكلم عن " الطفل ما بيشوفش مامي بتلعب رياضة فمابيبقاش هو كمان .." ماقدرتش اكمل بصراحة .. القناة التانية بقى .." طبعا كل ام بتخاف لما بيكون الطفل عنده تأخر في المشي .." والادهى الاتنين مباشر... طب قولولي ارد ااقول ايه
مش ذنب الجزيرة والعربية ان الناس متباعهم مادام الارضي زبالة وحاسس انه قاعد في حضانة... هما الي وصلونا للجزيرة مايجوش يقلولنا ماتتفرجوش عليها .. اه وحكاية موقع الجزيرة مكتوب فيه معا لأسقاط مصر تقريبا .. هو انا حبقى بنصب وااقول ياناس ياهو انا نصاب .. حتبقى غرف مغلقة يا بني ادمين وااقولك على حاجة كمان موقع وزارة الداخلية والاتصالات نفسهم اتهيك عليهم .. وادي اللينك يا سيدي
قال يعني احنا كنا عايشين في رخاء والوظايف نازلة ترف علينا .. اولا الاقتصاد كان فيه نمو .. ايوة .. راح فين بقى ؟؟ على رأي عمرو اديب .. معدلات النمو زي الهرم .. اللي في الهرم من فوق واخدين اكبر كمية مطر .. انما اللي تحت بيطرطش عليهم طينة
فلوس البلد كلها كانت في طبقة معينة .. والطبقة دي وقت الاحداث اخدت الفلوس وهربت ..وبعدين ماطول عمرهم بياخدو قروض ويهربو وماحدش بيجيبهم تاني وكانت البلد بتطلع فلوس .. قالك حيحجزو على اموال ناس بقى وكدة .. احب اريح ضمايركم .. الناس دي بتحط 10% من دخلهم هنا والباقي في سويسرا .. وعند المدام والعيال .. حقهم بردو ماهم بيأمنو مستقبلهم .
من الاخر ثمن الحرية صعب .. لو ماضحناش دلوقتي حنفضل في الطين مدفونين .. الرزق على الله مش على مبارك .. اقتراحات كتير لتكوين صندوق دعم في كل لجنة شعبية ..وماتقلقوش الرزق على الله .. وعلى راي المثل وجع ساعة ولا كل ساعة
دي اليابان كانت رماد .. اصبحت النهاردة اقوى الدول في العالم .. واحنا لسة في دول العالم الثالث .. قال اقتصاد قال
الامن والامان
وعشان انا اسكندرانية صرف اسمحلي ااقولك على راي سعيد صالح " احي ياابو سوسو احي " .. نعم ياخويا سمعني امن وامان ايه لو سمحت .. مش ده الامن اللي بيحمي النظام .. اللي طلع كله في مظاهرات عشان حسني .. ولما تعبو سابولو البلد كلها .. ده ماحدش كان شايف اي عسكري كان الارض بلعتهم . .الاقسام اتحرقت .. ماشي .. هي كل الشرطة في الاقسام .. طب عسكري المرور ماله . .الشرطة العسكرية طيب .. امن ايه اللي ماهمهوش امن الناس.. مش حالفين يمين الناس دي.. مش دول اللي فتحو سجون مصر.. طب سجن فقدو السيطرة عليه ماشي معقولة .. انما معظم السجون فقد السيطرة عليهم !!.. اساسا المساجين ماكنوش عارفين باللي بيحصل برا .. مش ده الامن اللي عربيته داست على الناس ورشت عليهم المايا وهما بيصلو وضربت عليهم قنابل مسيلة بالدموع وهما بيذكرو اسم الله
الناس كفرت يا ناس .. ده لو واحد مسلم ومربي دقنه خايف.. والمسيحي بقى خايف يروح كنيسته .. ولا انتو نسيتو الحادثة اللي لسة دمها مابردش .. كان كل هم الامن انهم يلمو اي حد بيطلع المظاهرات ويبهدلوه ويبهدلو اهله واتاوات وبلطجة .. مش ده بردو اللي بيبقى جايب بلطجية وقت الانتخابات عشان ماحدش يرشح غير مرشحين الحزب
ده الامن اللي انتو عايزينه
بصراحة شباب الشارع كان ارجل منهم
حقنا للدماء
مش كفايا الناس اللي ماتت
ااقولك سر.. نازلين عاملين حساب انهم حيموتو .. بس احب افكرك بحاجة .. اول امبارح كانت الذكرى الخامسة لغرق العبارة .. ااقولك كام واحد اتوفى فيها .. حوالي 1400 .. طب افكرك بقطر الصعيد اللي اتحرق بردو كان في فبراير 2002 .. مات فيه حسب الحكومة 360 .. وده كان عيد على فكرة .. والارقام الغير موثقة بتقول اضعاف الرقم ده والخبر من هنا
ده بس على سبيل المثال وليس الحصر.. تمن الحرية صعب ربنا يرحمهم جميعا ويكتبهم شهداء
الدستور
اهو ده اللعبة الكبيرة
مااحنا بنقول نعدله بقالنا اكتر من 8 سنين بدل ماهو منيل .. لازم يموت الناس ويوقفو الدنيا عشان سيادته يتكلم ويقول حنبقى نبص فيهم
طيب وقعنا في مشكلة الا وهي الدستور بيقول لو مشيناه ماحدش حيغير الدستور
احب اطمن سيادتك وااقولك نام قرير العينين .. فقهاء الدستور في ميدان التحرير بيطالبو برحيل الديكتاتور .. وبيقولولك حنتصرف احنا وسيبها علينا اساسا ده كله مخروب وادي لينك كمان يلا مش حرماكم من حاجة يا حبايبي
وبعدين انا عايزة ارعف هو الدستور ده كتاب الهي اخاف اغيره ربنا يعاقبني .. ماهو بشر اللي كاتبينه مانغيره ايه الفكرة . .هي الثورات بتقوم ليه اصلا !!
افكركم بحاجة البلد اللي انتو بتحبوها دي عملت ثورات كتير وكانت بتتحسن .. بس احنا في عنق الزجاجة يا نكمل الثورة يا نموتها
اي ثورة ليها ضرايب وليها تمن
افكركم يا ولاد بنتائج ثورة 19 يمكن تكونو نسيتوها
صدور اول دستور مصري .. واعلان مصر دولة مستقلة .. والغاء الحماية البريطانية على مصر وتعين سعد زغلول رئيس وزراء .. هه.. فاكرين اعدادية ولا نسيتوها
طب ثورة 23 يوليو
اولا هي انقلاب عسكري ماكنتش ثورة ماتخليهومش يضحكو عليكم .. اهم نتايجها اعلان الجمهورية .. عارفين ليه يا ولاد .. عشان الملك فاروق كان بيحب مصر.. خاف عليها لتخرب والجيش يضرب العساكر الملكية وهما كلهم مصريين وخاف على الدم بتاعهم قالك ايه نزولا على رغبة الشعب
أمر ملكي رقم 65 لسنة 1952
نحن فاروق الأول ملك مصر والسودان
لما كنا نتطلب الخير دائما لأمتنا ونبتغي سعادتها ورقيها
ولما كنا نرغب رغبة أكيدة في تجنيب البلاد المصاعب التي تواجهها في هذه الظروف الدقيقة
ونزولا على إرادة الشعب.
قررنا النزول عن العرش لولي عهدنا الأمير أحمد فؤاد وأصدرنا أمرنا بهذا إلى حضرة صاحب المقام الرفيع علي ماهر باشا رئيس مجلس الوزراء للعمل بمقتضاه.
صدر بقصر رأس التين في 4 ذي القعدة 1371 هـ (26 يوليو 1952).
الملك ابن الملك .. قالك تجنب البلاد المصاعب .. يلا حنقول ايه غير الله يرحمه .. كان بيفهموك طول عمرك انه كان بيكره البلد !!
الاخوان حيحكمونا
ياجمالكم والله .. بقت دلوقتي اخوان والبرادعي والسيد البدوي وكل الكراكيب دي .. هو مين حينتخبهم .. المسيحين مش عايزين الاخوان طبعا .. وحياتكم ولا المسلمين ..ماتقلقوش ..
ومش عايزين البرادعي ومش عايزين اي احزاب احنا حنعين ابو تريكة رئيس الجمهورية .. والزمالكوية حيضربونا
يا جماعة احنا مش حنجتمع على حد .. ده حتى احمد زويل حبيب الشعب بيقولك عليه قضي 4 شهور في اسرائيل ..اتفقنا على ان لا نتفق
بس كل واحد ومقدرته .. الاخوان واخدين الجانب الاكبر من الرفض.. والبرادعي حاليا وراه .. وفي ائتلاف معارض وحكايات
انا بردو وده رأيي الشخصي نفوض لجنة الحكماء تتناقش في الموضوع ده .. احنا مش محتاجينهم كلهم ملايكة .. الراجل اللي اسمه احمد شفيق .. ده داهية منيلة .. يوديك البحر ويرجعك عطشان .. اهو ده بالذات عايزاه في المرحلة الجاية .. ليه عشان هو سياسي ماهر وده مطلوب... وبردو ليه قبول وليه رفض .
اخيرا عشان تعبت بقى
نديله فرصة تانية وميدان التحرير موجود
ياختي كميلة .. هو كان 30 سنة مش مكفينه شفنا معاه كل انواع الفساد .. حيصلح في 6 شهور؟.. ياجماعة ماهو رأس الافعى .. ماهو على حسب الدستور بتاعنا الخربان
المادة (184)
الشرطة هيئة مدنية نظامية، رئيسها الأعلى رئيس الجمهورية. وتؤدى الشرطة واجبها في خدمة الشعب، وتكفل للمواطنين الطمأنينة والأمن، وتسهر على حفظ النظام والأمن العام والآداب، وتتولى تنفيذ ما تفرضه عليها القوانين واللوائح من واجبات، وذلك كله على الوجه المبين بالقانون
ممكن نحاكمه على اللي الشرطة بتعمله مش هو رئيسها !!! وبعدين هو فين اصلا.. ده ولا كأنه في البلد .. يا جماعة ده جبان .. 30 سنة الناس اتنبح صوتها .. بعد مالناس وقفتله وماتت .. طلع يغير الحكومة ويقولك حعدل الدستور .. وحعيش وحموت فيها .. مابلاش اشتم بقى .. ال6 شهور دول حياخد كل اللي عايزه ويطلع كانه بطل .. ده مش بطل .. ده مجرم حرب .. الناس ماتت واتسرقت في عهده وهو ولا كأنه يعرف .. وبعدين ميدان التحرير مش موجود .. الجيل هو اللي مش موجود . .التاريخ أثبت ان مافيش جيل بيعمل ثورتين
اخر كلامي الناس اللي مؤيده بقائه وهما معترضين على حسني
نحن في عنق الزجاجة .. سيبونا نخرج منها بدل ماتدفنو علينا التراب
ده احنا شعب 6 الاف سنة مش 30 سنة .. دي الشعوب بتحبنا و الناس اللي عايشة برا اكتر ناس عارفة كدة .. ده الواحد كان مكسوف انه مصري .. الواحد النهاردة حابب يسمع انه مصري .. كونو معانا عشان الثورة تقوى بينا .. مانلاقيش حد سرقها مننا
خليكم معانا عشان البلد دي ترجع تعيش بكرامة تاني .. ماترجعش للذل من تاني .. خليكو معانا عشان مصر
لحد امبارح بليل كنت بكتب نوت للتظاهر يوم الجمعة بعد الصلاة .. ودخلت في مناقشات على الفيس بوك فانه ننزل ولا ماننزلش وماكملتش نشر النوت
طبعا انا بما اني من المعارضة طبيعي فكنت في جانب التظاهر ومعظم صحابي كانو في الجانب الآخر .. جانب الجنوح السلمي وكفايا اوي كدة لغاية دلوقتي
ضغطي اترفع وصدعت بصراحة وكنت حاسة بكتير من كلامهم فيه حق بس انا كنت اتخنقت من اللي حصل امبارح الفجر وماكنتش نايمة بقالي 4 ايام كويس وانا عارفة دماغي كانت مصفحة ضد اي اقتناع بليل
ولكن
انا طبيعتي اني بحب ادور في كل نقاط النقاش واشوفه من وجه نظر مختلفة وبالذات لو عليه اجماع
ماهو طبيعي الاجماع بيبقى فيه شبه الصحيح عن الجانب المنشق عليه
نمت وصحيت عملت سيرش وبدأت اجمع الكلام اللي بيتناقشو فيه
وده اللي توصلتله
اولا : بما اني من المتوترين ( يعني من اصحاب تويتر ) احب ااقول للناس اللي بتقول ان اللي كانو في 25 يناير مشيو ودول عناصر اجنبيه وناس دخيلة عليهم
الناس اللي نزلت يوم التلات مازال في معظمهم في التحرير .. ولكن احقاقا للحق .. ماحدش كان متخيل انهم حيعملو حاجة فلما عملو نطو علهيم الاحزاب السياسية وبدأو يتكلمو في مطالب سياسية وبدأت الامور تتجه ناحية تانية
ثانيا : حسني مبارك بيتعامل معانا معاملة سيبهم يهوهو ولولا كدة ماكنش التعامل معانا كان بالشكل المفجع يوم الجمعة اللي فاتت .. ماكنتش القنوات الارضية وقت مالدنيا قايمة الاولى بتتكلم في ان الطفل مابيشوفش مامي بتلعب رياضة فاكيد مش بيتربى فيه حس الرياضة .. والقناة التانية بتتكلم في مشكلة ان الطفل المتاخر عن المشي .. والجزيرة والعربية وكل القنوات الفضائية كانت مهتمة بينا اكتر ...ماكنش خلال الفترة دي عبرنا بخطابين بس اول واحد فيهم بعد الازمة باربع ايام وفي نص الليل
ثالثا : عمليات التخريب والنهب والسلب مش السبب فيها المتظاهرين .. السبب فيها اللي فتح السجون للمساجين من شمال مصر لجنوبها وبيستخدم بلطجية في الشوارع .. ومعاند ومكابر ومش راضي ينزل وخلي البلد تولع انا مش ماشي والشعب شعبي مش شعب حد تاني...ده الملك ابن الملك تنحى عن الحكم حقنا للدماء وده مش راضي يمشي ابدا
رابعا : اشكاليات تعديلات الدستور انا بالنسبالي ربنا يستر ويلحقو يعدلوها اصلا قبل الانتخابات وارجع وااقول هو كان لازم يعدي اكتر من اسبوع على الناس اللي في الشارع عشان سيادته يعدل الدستور !!.. يارب ارحم الشهدا وصبر اهاليهم
خامسا : الاقتصاد اللي وقع ... يا جماعة الناس اصلا مش حاسة باي اقتصاد ولا اي تنمية الحكاية دي مش حتلعب معاهم الناس دي جتتهم منحسة
سادسا : نظرية وجود عناصر اجنبية للقلب نظام الحكم ... ياجماعة احب اطمنكم انا من المؤمنيييين بنظرية المؤامرة وعارفة كل الحاجات دي
المظاهرات ماكنتش ناس بتحاول تقلب نظام الحكم من برا.. ليه بقى ؟ ..نقعد كدة ونحللها مع بعضينا
مبارك هو اكبر حليف لأمريكا واسرائيل في منطقة الشرق الاوسط وخسارة كبيرة اوي ليهم لو مشي حاليا
من الاول المظاهرات اسرائيل خافت وقالتلك السلطة يجب ان تحافظ على السلام مع اسرائيل و بدأت تبعت لأمريكا والدول الاوروبية تدعم موقف مبارك
امريكا بقى كانت متخبطة جدا من الاول .. لكن بمرور الوقت واضح ان موقف مبارك ضعيف فبدأت تاخد الخيار الثاني خليها مع الشعب مادام ده وقع خلاص
لا يمنع وجود ناس من برا عايزة اي خراب في مصر .. امال هما اخترعو فكرة الجاسوسية ليه بالله عليكم .. وبعدين دي مصر .. يعني مغناطيس جواسيس العالم
نيجي بقى لنظرية قلب الاوضاع ودي اللي فعلا ممكن تلعبو بيها على دماغي ونتكلم فيها
احنا لغاية دلوقتي واخدين معظم اللي عايزينه ولغاية الخطاب اللي من يومين كنت قلت اجنح للسلم ونرجع تاني للسياسة معاهم ونعصر على نفسنا لمون ونستحمله بقى لكن رجعو ضربوهم بالرصاص ربنا ياخدهم والموضوع ده نرفزني
لكن ارجع وواقول رئيس الوزرا والنائب بيتعاملو بحكمة جدا
وارجع وارد عليهم وااقولهم اسفكم مش حيرجع اللي ماتو
طيب الناس بدأت تتعب فعلا واحنا بقينا ارض خصبة لأي اعمال هجوم على مصر والامن بتاعنا كان ضايع بقى مش موجود اصلا
عملت سيرش في الحكاية دي وكان في موضوع كويس قريته احبكم تقروه
