النهاردة الجمعة 4 فبراير الساعه 10 الا ربع الصبح
لحد امبارح بليل كنت بكتب نوت للتظاهر يوم الجمعة بعد الصلاة .. ودخلت في مناقشات على الفيس بوك فانه ننزل ولا ماننزلش وماكملتش نشر النوت
طبعا انا بما اني من المعارضة طبيعي فكنت في جانب التظاهر ومعظم صحابي كانو في الجانب الآخر .. جانب الجنوح السلمي وكفايا اوي كدة لغاية دلوقتي
ضغطي اترفع وصدعت بصراحة وكنت حاسة بكتير من كلامهم فيه حق بس انا كنت اتخنقت من اللي حصل امبارح الفجر وماكنتش نايمة بقالي 4 ايام كويس وانا عارفة دماغي كانت مصفحة ضد اي اقتناع بليل
ولكن
انا طبيعتي اني بحب ادور في كل نقاط النقاش واشوفه من وجه نظر مختلفة وبالذات لو عليه اجماع
ماهو طبيعي الاجماع بيبقى فيه شبه الصحيح عن الجانب المنشق عليه
نمت وصحيت عملت سيرش وبدأت اجمع الكلام اللي بيتناقشو فيه
وده اللي توصلتله
اولا : بما اني من المتوترين ( يعني من اصحاب تويتر ) احب ااقول للناس اللي بتقول ان اللي كانو في 25 يناير مشيو ودول عناصر اجنبيه وناس دخيلة عليهم
الناس اللي نزلت يوم التلات مازال في معظمهم في التحرير .. ولكن احقاقا للحق .. ماحدش كان متخيل انهم حيعملو حاجة فلما عملو نطو علهيم الاحزاب السياسية وبدأو يتكلمو في مطالب سياسية وبدأت الامور تتجه ناحية تانية
ثانيا : حسني مبارك بيتعامل معانا معاملة سيبهم يهوهو ولولا كدة ماكنش التعامل معانا كان بالشكل المفجع يوم الجمعة اللي فاتت .. ماكنتش القنوات الارضية وقت مالدنيا قايمة الاولى بتتكلم في ان الطفل مابيشوفش مامي بتلعب رياضة فاكيد مش بيتربى فيه حس الرياضة .. والقناة التانية بتتكلم في مشكلة ان الطفل المتاخر عن المشي .. والجزيرة والعربية وكل القنوات الفضائية كانت مهتمة بينا اكتر ...ماكنش خلال الفترة دي عبرنا بخطابين بس اول واحد فيهم بعد الازمة باربع ايام وفي نص الليل
ثالثا : عمليات التخريب والنهب والسلب مش السبب فيها المتظاهرين .. السبب فيها اللي فتح السجون للمساجين من شمال مصر لجنوبها وبيستخدم بلطجية في الشوارع .. ومعاند ومكابر ومش راضي ينزل وخلي البلد تولع انا مش ماشي والشعب شعبي مش شعب حد تاني...ده الملك ابن الملك تنحى عن الحكم حقنا للدماء وده مش راضي يمشي ابدا
رابعا : اشكاليات تعديلات الدستور انا بالنسبالي ربنا يستر ويلحقو يعدلوها اصلا قبل الانتخابات وارجع وااقول هو كان لازم يعدي اكتر من اسبوع على الناس اللي في الشارع عشان سيادته يعدل الدستور !!.. يارب ارحم الشهدا وصبر اهاليهم
خامسا : الاقتصاد اللي وقع ... يا جماعة الناس اصلا مش حاسة باي اقتصاد ولا اي تنمية الحكاية دي مش حتلعب معاهم الناس دي جتتهم منحسة
سادسا : نظرية وجود عناصر اجنبية للقلب نظام الحكم ... ياجماعة احب اطمنكم انا من المؤمنيييين بنظرية المؤامرة وعارفة كل الحاجات دي
المظاهرات ماكنتش ناس بتحاول تقلب نظام الحكم من برا.. ليه بقى ؟ ..نقعد كدة ونحللها مع بعضينا
مبارك هو اكبر حليف لأمريكا واسرائيل في منطقة الشرق الاوسط وخسارة كبيرة اوي ليهم لو مشي حاليا
من الاول المظاهرات اسرائيل خافت وقالتلك السلطة يجب ان تحافظ على السلام مع اسرائيل و بدأت تبعت لأمريكا والدول الاوروبية تدعم موقف مبارك
امريكا بقى كانت متخبطة جدا من الاول .. لكن بمرور الوقت واضح ان موقف مبارك ضعيف فبدأت تاخد الخيار الثاني خليها مع الشعب مادام ده وقع خلاص
لا يمنع وجود ناس من برا عايزة اي خراب في مصر .. امال هما اخترعو فكرة الجاسوسية ليه بالله عليكم .. وبعدين دي مصر .. يعني مغناطيس جواسيس العالم
نيجي بقى لنظرية قلب الاوضاع ودي اللي فعلا ممكن تلعبو بيها على دماغي ونتكلم فيها
احنا لغاية دلوقتي واخدين معظم اللي عايزينه ولغاية الخطاب اللي من يومين كنت قلت اجنح للسلم ونرجع تاني للسياسة معاهم ونعصر على نفسنا لمون ونستحمله بقى لكن رجعو ضربوهم بالرصاص ربنا ياخدهم والموضوع ده نرفزني
لكن ارجع وواقول رئيس الوزرا والنائب بيتعاملو بحكمة جدا
وارجع وارد عليهم وااقولهم اسفكم مش حيرجع اللي ماتو
طيب الناس بدأت تتعب فعلا واحنا بقينا ارض خصبة لأي اعمال هجوم على مصر والامن بتاعنا كان ضايع بقى مش موجود اصلا
عملت سيرش في الحكاية دي وكان في موضوع كويس قريته احبكم تقروه
ومن يوم التلات اللي قبل اللي فات كان فعلا الادمن بيكتب والناس قالتله انت مانزلتش ليه رد علهيم قالهم ادمن واحد في المظاهرة وانا برا مصر
وعلى المقال ده بالذات بدأت ااقول ربنا يستر
اوك مافيش وقت ارجع ااقول الناس تروح ولا ماتروحش
الناس فعلا راحت من امبارح بس بقول ربنا يستر على النهاردة
طب نروح ولا مانروحش
اوك نقطة صعبة جدا لأن الناس هناك لو قلة حيتصفو حيتصفو يعني
طب اللي عارف حد من صحابه مالوش توجهات سياسية يبتدي يكلمه يحاول يقنعه ان ناخد طريق تاني للتعامل وان الاسلوب ده ليه ثغرات كتير وضعف جدا
التيارات السياسية زي الاخوان وكفايا والوفد والناس دي كلها سياسيين بيعرفو يتعاملو بالتظاهرات ويقدرو يهدو اتباعهم
حاسة اني تعبانة لأني مع رحيله وبردو مش عايزة تدخلات اجنبية فينا كفايا اوي اللي احنا فيه
نهدى ونحاول نكلم الناس يحاولو يوصلو كلمتهم ويحاولو ياخدو الامان ويمشو ونستنى نشوف الحكومة الجديدة لأنها فعلا حتحاول تهدي الشعب وتعمل كل اللي نفسنا فيه
نعصر على نفسنا بقيت لمون البلد المحلي منه والمستورد والطازة والمخلل والاضاليا
مش حنديله هو فرصة تانية خليه زي خيال المآتة في الحكم
لكن ندي الحكومة فرصة تانية
ربنا يستر على الناس .. واللي راح في تظاهرات مش خايف من الموت ده طالبه عشان كفران من اللي شايفه
وندعي مايكنش في دم النهاردة
ونرجع تاني زي الاول
ونرجع تاني زي الاول
يارحيم ارحمنا
يا مغيث اغثنا
يا لطيف الطف بنا
اللهم لا نسألك رد القضاء ولكن نسألك اللطف به
No comments:
Post a Comment