بس الاول لو من مؤيدي مبارك ومحبيه اطلع برا مش عايزاك تقرا البوست اصلا
مابتحبهوش ومنقسم حول بقائه وعدم وجوده تعالى نتكلم ونحللها مع بعض
أولا للديموقراطية حبتدي بوجهات النظر الاخر
ماتهينوش رمز مصر
اهو ده بقى بيفرسني اكبر فرسة عشان كدة قلت ابتدي بيه... واحد طالع يقولي اللي بيهين رمز مصر بيهين مصر... والله انا ماشفتش سمعة مصر بالجمال ده في العالم كله غير اليومين دول .. لو مش مصدقني روح بص كل كومنتات العالم علينا .. ده انا كنا بنتشتم عيني عينك مابنعرفش نرد .. يتقالنا يا عملا يا خونة يا مؤيدي اسرائيل نقلهم دي الحكومة وماتاخدوش المصريين بذنبهم .. كنا بنديهم الغاز وسايبين غزة في ضلمة .. ده ابونا حد يهين ابوه ده الرسول وصى على الشيخ الكبير.. ابويا نايم جوا مالكش دعوة بيه .. والرسول لما وصى على الشيخ الكبير مارحتش تتشطر على الحكومة وتقلها كدة في وشها ليه .. ماالناس كانت بتتسحل في الارض ماحدش قال ده كبير ولا صغير .. كان البياع بيتاخد منه حاجته ويتبهدل ماحدش قال ارحموه ليه .. كان بيتاخد منهم عيالهم مابيعرفوش ينامو الليل.. لما عربيات الامن يوم الجمعة اللي فاتت بقت تجري تدخل في الناس ماقلتلهمش كدة ليه ؟؟ اللي حيقولي ليس منا من لم يرحم صغيرنا ويوقر شيخنا حقوله الرسول قال : ( الراحمون يرحمهم الرحمن ارحموا من في الأرض يرحمكم من في السماء الرحم شجنة من الرحمن فمن وصلها وصله الله ومن قطعها قطعه الله ) رواه الترمذي
لازم يخرج خروج مشرف
على ايه ؟؟ .. مانت تقولي ليه بردو .. حتقولي صاحب الضربة الجوية وصاحب اعظم الانجازات .. اللي من فلوسنا وضاريبنا ولا كانت من جيب اهله؟ طب حسيبك مع لينك تقراه وتعرف انجازاته
وحسيبكم من اقتباس من بلال فضل من مقاله لماذا قتلت شعبك
"هذه المرة، أنت تعلم بأن شعبك كان يُقتل ويُهان ويُقمع ويُسحل فى شوارع مصر، إذا لم تكن قد أمرت بذلك فلابد أنهم نقلوا لك ما حدث فى التقارير، وإذا كانوا لم ينقلوه لك فلابد أنك شاهدته فى الفضائيات والصحف المصرية العربية والأجنبية التى قاومت قمع أجهزتك ونجحت فى تسريب بعض الصور بعيدا عن أيدى رجالك، إذا كنت تعلم فتلك مصيبة، لأنك خالفت ما أقسمت عليه بالحفاظ على أمن وسلامة المواطن، وإذا كنت لا تعلم فالمصيبة أعظم، لأنك عندها لا تستحق أن تكون رئيساً لنا."
عملاء واجندات خاصة
انا مش حنكر ان مصر مستهدفة والله .. ماهي مصر يا جماعة .. بس بصراحة احنا كنا مستهدفين الاول اكتر .. لييييييه .. ااقولكم .. فاكرين الشباب السيس اللي كان اهم حاجة عندهم جوزيه حيجي الاهلي وماتش الاهلى والزمالك وشاكيرا حتيجي مصر ولا لأ ومين سوبر ستار الشباب تامر ولا عمرو؟.. الشباب ده كان ممكن تهاجمو بمنتهى السهولة .. اقولك حاجة .. احنا في اعلى معدلات الوطنية والانتماء للبلد دي مش واخدين بالكم ان احنا كلنا بنتكلم في السياسة وكلنا خايفين بجد على مصلحة البلد ولو باختلاف وجهات النظر الناس اللي بتنزل تتظاهر وهي مش خايفة من رصاص .. حتدافع عن بلدها من اي كلب يحاول يدخل حياكلوه حيي اصلا .. دول مرعبوين منا الله يهديكم عشان كدة بيحاولو يكونو معاكم .. لما قلنا يتنحى وافقتو ولما الناس شافت اصراركم كلهم دلوقتي بيقلوله امشي.. عشان عارفين انه خلاص انتهى وبيضحو بيه في سبيل ارضاء الشعوب .. بقت كدة تدخل في شؤون مصر.. ماحدش حيقدر يدخل مصر ويتدخل في شؤونها .. بس هما مش حيقفو ساكتين اكيد ليهم موقف عشان دي مصر.. لو مع الرئيس حيخسرو البلد لأن الاوطان باقيه والافراد زائلون .. اجانب في المظاهرات واسرائيلي في السويس .. اولا لااجانب في كل حته في مصر.. ولا انت مش واخد بالك ان احنا اصلا بلد سياحي والاسرائيلين طول عمرهم بيتفسحو في البلد من اول طابا لحد مولد ابو حصيرة .. مش حقول مش حيدخلو بقى وينظمو جواسيس .. ده دور المخابرات و الجيش .. حتقولي البنت اللي طلعت في المحور حقولك هي اصلا امريكا واسرائيل حتقلب نظام الحكم ليه اذا كان اصلا موالي ليها ؟ اه تدرب عيال يتجسسو على اجهزة امنية زي المخابرات والجيش ماشي .. اسرار عسكرية اوك .. انما يشيلو صاحبهم جارهم حبيبهم .. ياخي ده احنا كنا بنتحاكم بعقوبة التحريض على دول صديقة .. ماتفوقو بقى واسيبكم مع فيديو بردو لبلال فضل بيتكلم فيه عن البت دي
والناس حتيجي تقولي الجزيرة وقطر ووثائق ويكليكيس .. منا قلت قبل كدة حد يجيبلي الوثائق ويبطل يردد .. ثانيا في فيديو على اليوتيوب من ايام زمان بيتكلم عن الموضوع ده .. ان في تعاون ما بين قطر واسرائيل مااعترضتش انا .. بس انكر تعاون مصر مع اسرائيل الاول.. انت كانك بتقولي الحق فلسطين بتتعاون مع اسرائيل.. ياابني ماكل الدول العربية بتتعامل معاهم اصلا
ثانيا يوم الجمعة اللي فاتت وقت الصلاه كنت فاتحة الجزيرة والعربية والحرة كانت بتنقل من ميدان التحرير والناس كلها معانا .. قلت ابص علىا لارضي
الاولى كانت واحده بتتكلم عن " الطفل ما بيشوفش مامي بتلعب رياضة فمابيبقاش هو كمان .." ماقدرتش اكمل بصراحة .. القناة التانية بقى .." طبعا كل ام بتخاف لما بيكون الطفل عنده تأخر في المشي .." والادهى الاتنين مباشر... طب قولولي ارد ااقول ايه
مش ذنب الجزيرة والعربية ان الناس متباعهم مادام الارضي زبالة وحاسس انه قاعد في حضانة... هما الي وصلونا للجزيرة مايجوش يقلولنا ماتتفرجوش عليها .. اه وحكاية موقع الجزيرة مكتوب فيه معا لأسقاط مصر تقريبا .. هو انا حبقى بنصب وااقول ياناس ياهو انا نصاب .. حتبقى غرف مغلقة يا بني ادمين وااقولك على حاجة كمان موقع وزارة الداخلية والاتصالات نفسهم اتهيك عليهم .. وادي اللينك يا سيدي
اقتصاد البلد والبطالة
قال يعني احنا كنا عايشين في رخاء والوظايف نازلة ترف علينا .. اولا الاقتصاد كان فيه نمو .. ايوة .. راح فين بقى ؟؟ على رأي عمرو اديب .. معدلات النمو زي الهرم .. اللي في الهرم من فوق واخدين اكبر كمية مطر .. انما اللي تحت بيطرطش عليهم طينة
فلوس البلد كلها كانت في طبقة معينة .. والطبقة دي وقت الاحداث اخدت الفلوس وهربت ..وبعدين ماطول عمرهم بياخدو قروض ويهربو وماحدش بيجيبهم تاني وكانت البلد بتطلع فلوس .. قالك حيحجزو على اموال ناس بقى وكدة .. احب اريح ضمايركم .. الناس دي بتحط 10% من دخلهم هنا والباقي في سويسرا .. وعند المدام والعيال .. حقهم بردو ماهم بيأمنو مستقبلهم .
من الاخر ثمن الحرية صعب .. لو ماضحناش دلوقتي حنفضل في الطين مدفونين .. الرزق على الله مش على مبارك .. اقتراحات كتير لتكوين صندوق دعم في كل لجنة شعبية ..وماتقلقوش الرزق على الله .. وعلى راي المثل وجع ساعة ولا كل ساعة
دي اليابان كانت رماد .. اصبحت النهاردة اقوى الدول في العالم .. واحنا لسة في دول العالم الثالث .. قال اقتصاد قال
الامن والامان
وعشان انا اسكندرانية صرف اسمحلي ااقولك على راي سعيد صالح " احي ياابو سوسو احي " .. نعم ياخويا سمعني امن وامان ايه لو سمحت .. مش ده الامن اللي بيحمي النظام .. اللي طلع كله في مظاهرات عشان حسني .. ولما تعبو سابولو البلد كلها .. ده ماحدش كان شايف اي عسكري كان الارض بلعتهم . .الاقسام اتحرقت .. ماشي .. هي كل الشرطة في الاقسام .. طب عسكري المرور ماله . .الشرطة العسكرية طيب .. امن ايه اللي ماهمهوش امن الناس.. مش حالفين يمين الناس دي.. مش دول اللي فتحو سجون مصر.. طب سجن فقدو السيطرة عليه ماشي معقولة .. انما معظم السجون فقد السيطرة عليهم !!.. اساسا المساجين ماكنوش عارفين باللي بيحصل برا .. مش ده الامن اللي عربيته داست على الناس ورشت عليهم المايا وهما بيصلو وضربت عليهم قنابل مسيلة بالدموع وهما بيذكرو اسم الله
الناس كفرت يا ناس .. ده لو واحد مسلم ومربي دقنه خايف.. والمسيحي بقى خايف يروح كنيسته .. ولا انتو نسيتو الحادثة اللي لسة دمها مابردش .. كان كل هم الامن انهم يلمو اي حد بيطلع المظاهرات ويبهدلوه ويبهدلو اهله واتاوات وبلطجة .. مش ده بردو اللي بيبقى جايب بلطجية وقت الانتخابات عشان ماحدش يرشح غير مرشحين الحزب
ده الامن اللي انتو عايزينه
بصراحة شباب الشارع كان ارجل منهم
حقنا للدماء
مش كفايا الناس اللي ماتت
ااقولك سر.. نازلين عاملين حساب انهم حيموتو .. بس احب افكرك بحاجة .. اول امبارح كانت الذكرى الخامسة لغرق العبارة .. ااقولك كام واحد اتوفى فيها .. حوالي 1400 .. طب افكرك بقطر الصعيد اللي اتحرق بردو كان في فبراير 2002 .. مات فيه حسب الحكومة 360 .. وده كان عيد على فكرة .. والارقام الغير موثقة بتقول اضعاف الرقم ده والخبر من هنا
ده بس على سبيل المثال وليس الحصر.. تمن الحرية صعب ربنا يرحمهم جميعا ويكتبهم شهداء
الدستور
اهو ده اللعبة الكبيرة
مااحنا بنقول نعدله بقالنا اكتر من 8 سنين بدل ماهو منيل .. لازم يموت الناس ويوقفو الدنيا عشان سيادته يتكلم ويقول حنبقى نبص فيهم
طيب وقعنا في مشكلة الا وهي الدستور بيقول لو مشيناه ماحدش حيغير الدستور
احب اطمن سيادتك وااقولك نام قرير العينين .. فقهاء الدستور في ميدان التحرير بيطالبو برحيل الديكتاتور .. وبيقولولك حنتصرف احنا وسيبها علينا اساسا ده كله مخروب وادي لينك كمان يلا مش حرماكم من حاجة يا حبايبي
انا عن نفسي مقتنعه بفكرة لجنة الحكماء وقريت كلامهم ومقتنعه بيه وادي اللينك يا جماعة عشان تعرفو انا كريمة اد ايه
وبعدين انا عايزة ارعف هو الدستور ده كتاب الهي اخاف اغيره ربنا يعاقبني .. ماهو بشر اللي كاتبينه مانغيره ايه الفكرة . .هي الثورات بتقوم ليه اصلا !!
افكركم بحاجة البلد اللي انتو بتحبوها دي عملت ثورات كتير وكانت بتتحسن .. بس احنا في عنق الزجاجة يا نكمل الثورة يا نموتها
اي ثورة ليها ضرايب وليها تمن
افكركم يا ولاد بنتائج ثورة 19 يمكن تكونو نسيتوها
صدور اول دستور مصري .. واعلان مصر دولة مستقلة .. والغاء الحماية البريطانية على مصر وتعين سعد زغلول رئيس وزراء .. هه.. فاكرين اعدادية ولا نسيتوها
طب ثورة 23 يوليو
اولا هي انقلاب عسكري ماكنتش ثورة ماتخليهومش يضحكو عليكم .. اهم نتايجها اعلان الجمهورية .. عارفين ليه يا ولاد .. عشان الملك فاروق كان بيحب مصر.. خاف عليها لتخرب والجيش يضرب العساكر الملكية وهما كلهم مصريين وخاف على الدم بتاعهم قالك ايه نزولا على رغبة الشعب
الملك ابن الملك .. قالك تجنب البلاد المصاعب .. يلا حنقول ايه غير الله يرحمه .. كان بيفهموك طول عمرك انه كان بيكره البلد !!
الاخوان حيحكمونا
ياجمالكم والله .. بقت دلوقتي اخوان والبرادعي والسيد البدوي وكل الكراكيب دي .. هو مين حينتخبهم .. المسيحين مش عايزين الاخوان طبعا .. وحياتكم ولا المسلمين ..ماتقلقوش ..
ومش عايزين البرادعي ومش عايزين اي احزاب احنا حنعين ابو تريكة رئيس الجمهورية .. والزمالكوية حيضربونا
يا جماعة احنا مش حنجتمع على حد .. ده حتى احمد زويل حبيب الشعب بيقولك عليه قضي 4 شهور في اسرائيل ..اتفقنا على ان لا نتفق
بس كل واحد ومقدرته .. الاخوان واخدين الجانب الاكبر من الرفض.. والبرادعي حاليا وراه .. وفي ائتلاف معارض وحكايات
انا بردو وده رأيي الشخصي نفوض لجنة الحكماء تتناقش في الموضوع ده .. احنا مش محتاجينهم كلهم ملايكة .. الراجل اللي اسمه احمد شفيق .. ده داهية منيلة .. يوديك البحر ويرجعك عطشان .. اهو ده بالذات عايزاه في المرحلة الجاية .. ليه عشان هو سياسي ماهر وده مطلوب... وبردو ليه قبول وليه رفض .
اخيرا عشان تعبت بقى
نديله فرصة تانية وميدان التحرير موجود
ياختي كميلة .. هو كان 30 سنة مش مكفينه شفنا معاه كل انواع الفساد .. حيصلح في 6 شهور؟.. ياجماعة ماهو رأس الافعى .. ماهو على حسب الدستور بتاعنا الخربان
ممكن نحاكمه على اللي الشرطة بتعمله مش هو رئيسها
No comments:
Post a Comment