March 12, 2013

9 بعد 9 .. محاولة توثيق قبل النسيان (1)

ضعي عصي الاختبار على سطح افقي مستوي وانتظري 5 دقائق لظهور النتيجة
لم أكن اعلم انها أطول 5 دقائق في حياة أي امرأة تنتظر خبر سعيد .. توتر وقلق ومشاعر متضاربة تمر .. ولما لا فأنه اول شهر بعد الزواج ..غريبة تلك المشاعر حقًا فلست من النساء التي يحلمن بالزواج كي تنجب اطفالا .. لا لست مستعدة لطفل يخرجني من حالة الفرح والمرح .. نعم يمر الوقت بطيئا مملا كل يوم حتى عودته من العمل . ولكن هل يعني هذا ان اضحى بملكيتي لوقتي  ..  .. لطفل ! .. لماذا تلك الحيرة .. عقلي لا يريد طفلا الان وقلبي يتمناه .. ولماذا تبدو تلك الدقائق الخمس لا نهائية .. كم الافكار التي تتسارع للمرور بعقلي خلال  تلك المدة حقًا رهيب .. اخيرا انتهت تلك الدقائق ليكون الناتج سلبي
لا يوجد حمل .. مابين الفرح والاحباط شعوري .. لما تلك الحيرة .. انا لست مستعدة بعد . فلنستمتع بوقتنا :)
------------------
انا : ضهري بيوجعني يا حبيبي .. مابقتش عارفة انام
هو : عشان قلتلك ماتعليش التكييف .. خدي مسكن ولا حاجة
بعد عدة ايام
أنا : على فكرة انا لسة ضهري بيوجعني .. والمسكن مش عامل حاجة .. ابقي هاتلي مرهم للضهر ولا لزقة
هو : حاضر بس ابقي فكريني وانا بكلمك
بعد الضهر
هو : مرهم للضهر لو سمحت
الصيدلي : هل في حمل ؟
هو : نعتبر في حمل
في البيت
أنا :  نعتبره حمل ! تفتكر ؟ :D
 من بداية الزواج وانا واخدة بالي من الادوية اللي باخدها .. عشان لو حصل وكنت حامل مايأثرش على الجنين .. عمري ما تخيلت  ..ان مرهم الضهر له علاقة بالحمل بصراحة .. يلا اهي بشرى خير
الألم مستمر .. لا مسكن نافع ولا مرهم مأثر :( 

أنا : ممكن تبقى تجيبلي اختبار حمل يا حبيبي
هو : على فكرة انتي مبوظة واحد الشهراللي فات وطلع سلبي .. لو كل شهر عملتيه وطلع سلبي حتتعبي .. استني شوية
 أنا : عشان خطري .. بلييييييز
هو : حاضر .. عشان خاطرك بس
مجرد التفكير ان ممكن اجيب اختبار حمل فتح شلال الافكار تاني .. يارب ارحمني

الخامسة فجرا .. قلقت من النوم .. وافتكرت الاختبار 
ضعي عصي الاختبار على سطح افقي مستوي وانتظري 5 دقائق لظهور النتيجة
تاني .. الخمس دقايق تاني .. هو انا فعلا مستعدة لبيبي دلوقتي ! ده مافاتش 3 شهور على جوازنا ! .. ياااااربي نفس الحيرة والاسئلة والقلق .. هو تقريبا الخمس دقايق دول لا نهائيين ولا ايه .. خطين ! .. خطين ! هما الخمس دقايق خلصو امتى ! خطين .. انا حامل !!
أنا : اصحى يا حبيبي .. ألف مبروك حتبقى بابا .. فيها بيبي
هو وهو نايم : ألف مبروك .. خخخخخخخ
ودي مشكلة الرجالة تقريبا .. مابيعرفوش يفرحو .. اخدت الموبايل وصورت الخطين :) .. ومانمتش يومها

وبما ان فيها بيبي .. تبتدي رحلة الحمل والدكتورة :)
اعملي التحاليل دي ودي ودي ودي .. وحنعمل سونار
ولأننا في السعودية فجوزي حبيبي ماشفش السونار فاخدت صوره وطلعت اورهاله
أنا : شايف النونو يا حبيبي
هو : فينه ده ؟
أنا : شايف الدايرة السودا الكبيرة دي .. شايف الدايرة البيضا اللي جواها .. هو بقى النقطة اللي جوا دي
هو : ايه النونو الفوتوشوب ده !!
فوتوشوب ! .. الرجالة فعلا مابتعرفش تفرح !

هل كنت مستنية اني اعدي اكتر من شهر ونص حامل وانا مااعرفش ولما اتأكد ابتدي الوحم ! .. بعد يومين من زيارة الدكتورة بدأت مرحلة القئ .. سئ بشكل غير طبيعي .. اول تجربة قئ كانت مليانة خوف .. لوحدي ماحدش معايا . شعيرات وجهي الدموية انفجرت .. تاركة لأثر غريب عليه .. وتتوالى اعراض الحمل بالظهور
قئ
رفض للاكل
قرف من اي ريحة بروتينات لدرجة انها ممكن تنتقل من الفريزر للتلاجة وبعدين للزبالة
نوووووووووووووووووووووووووووووم
مش طايقة اي ريحة .. للاسف زوجي اخد ما فيه النصيب .. ماكنتش استحمل ريحة الشامبو بعد الدش حتى ! والبرفانات ممنوعة نهائي
حموضة رهيبة لا نافع معاها اقتراحات الخيار ولا حتى الدوا
وجع لا ينتهي في الضهر
واصعب الاعراض جميعها .. انتفاخ القولون
ومع ألم الضهر وانتفاخ القولون .. مرت ايام وانا نايمة قاعدة .. عشان دي اكتر نومة مريحاني .. مصحوبة بدموع " صعبان عليا حالي "
ومع وجود مطعم تحت البيت .. فيعتبر الساعة 7 صباحا والساعة 11 ظهرا . أسوأ اوقات اليوم
مش عارفة ازبط البيت .. المطبخ بقى بشع .. البيت بشع .. حتى انا بقيت بشعة . فكرة الاستحمام نفسه بقت مرعبة من ريحة الشامبو والبلسم والشاور جل
هما : ماتقلقيش هما أول 3 شهور متعبين وبعد كدة بترتاحي
كدابين .. خلصو ال3 شهور ولسة تعبانة .. ومع الجيوب الانفية والجو شديد الجفاف .. استمرار للقئ لمنتصف الشهر الخامس
مع نهاية الشهر الخامس الامور اتحسنت . النوم اتزبط .. القئ خف جدا .. استمرار لألم الظهر .. استمرار لمشاكل القولون ..  . استمرار للحموضة
اشتريت "موسوعة الفراشة للعناية بالأم والطفل " .. واصبح الكتاب صديقي .. عايزة اعرف كل حاجة .. عن النونو
هما : هه بقى .. ولد ولا بنت ؟
انا : بنحاول نشوفه بس لسة مانعرفش
ايه النونو التقلان علينا ده .. كل ما نكشف عليه يستخبى مننا .. طب لحد امتى طيب ؟ .. يا مسهل الحال يارب .. الحمل ده طلع متعب بصحيح .. يكفيني الم ضهري . وبطني اللي بقت قدامي مترين !
منتصف الشهر السادس
الدكتورة : انتي عايزة بنت ولا ولد
أنا : كل اللي يجيبو ربنا كويس .. انا عايزة اعرف عشان اشتري هدوم
الدكتورة : تقريبا بنت
أنا : تقريبا !! يعني اتكل على الله واشتري روز ؟
الدكتورة : على خيرة الله :)

النونو .. بنت :)

November 7, 2012

الدين معاملة


ما القول في السيدة مارية القبطية رضي الله عنها ...كانت كافرة وبعدين اسلمت .. ولا كانت كتابية وبعدين اسلمت 

للحديث آداب .. مهما قلت للمسيحي انك كافر او مشرك عشان دينك بيقول كدة .. مش حيغير من رأيه حاجة 

ماهو للعلم كلنا كافرين بالنسبالهم ! لأننا مابنؤمش بديانتهم !! .. زي ماانت مقتنع انك على دين صح ودينه غلط .. هو كمان مقتنع انه على دين صح ودينك غلط 

لو فعلا شايف نفسك مسلم .. فالدين المعاملة ... المعاملة من ضمنها اداب الحديث .. من ضمنها انك تسمع اللي قصادك كلام مايؤذهوش سمعيا على الاقل 

لو ربنا امرنا نعاملهم بالشكل اللي انت متخيله .. كان سمح لرجال المسلمين يتجوز من الكتابيات ليه ؟!! يجوزها يذلها مثلا؟؟ .. طول اليوم يناديها ياكافرة. .قومي اعمليلي كوباية شاي !! 
شوية عقل وادب يرحمكم الله ! 

May 19, 2012



ارجع من تاني اقول كلام كتير منه مابيعجبش صحابي مش معنى اني حنتخب ان شاء الله ابو الفتوح .. ان ابو الفتوح فلة شمعة منورة والباقي يايا و يع اه حنتخب ابو الفتوح عشان شايفاه الاصلح حاليا للمرحلة دي .. يمكن في ظروف تانية ماكنش ابو الفتوح ينفع وحد غيره ينفع حنتخب ابو الفتوح .. بس بحترم و بؤيد جدا حمدين صباحي .. ومش حزايد عليه .. ناس كتير من اللي حتنتخب حمدين صباحي يمكن ماسمعتش اسمه غير السنادي .. لكن انا اعرف الراجل ده من اكتر من 6 سنين ومتبعاه .. ومش حقدر اقول عليه غير رجل مصري بسيط محترم مناضل لا يخاف لومة لائم .. وفعلا واحد مننا .. لكن انا شايفاه اصلح في ظروف تانية مش اللي احنا فيها 


حنتخب ابو الفتوح .. بس بحترم محمد مرسي .. ومش معنى ان تصرفات الاخوان كجماعة شايفة فيها سقطات وغلطات كتير . .بيقى الراجل كخة ووحش .. اسلوب الادارة شايفاه غلط .. انما في الاخر الاخوان شايفيين انهم بيعملو كل ده عشان وصولهم للحكم حيقوي الدولة الاسلامية .. هما مش شايفيين نفسهم بيعملو حاجة غلط .. حبهم للبلد ممشيهم بالطريقة دي .. ماحدش بيقعد يتبهدل عمره كله في ظل ظروف مافيهاش امل للسلطة طمعا في المناصب .. ناس كتير من الاخوان ماتت قبل ماتشوف اللحظة دي .. نشوة النصر اللحظية عمتهم عن حاجات كتير ... لكن ما اقدرش اخون ولا ازايد على محمد مرسي 


حنتخب ابو الفتوح .. لكن بحترم وبؤيد خالد علي . و شايفة فيه الامل اللي كلنا بنحلم بيه .. ومستنية اليوم اللي حيبقى فيه رئيسنا الشاب المنتخب 


حنتخب ابو الفتوح وانا لسة بحترم البسطويسي و العوا و الحريري 


ححترمهم حتى لو مش حنتخبهم .. ماحدش يقولي ده بيقول كذا وده بيقول كذا .. انا قلت من الاول ابو الفتوح مش الملاك الرباني اللي مابيغلطش .. كل المرشحين بشر .. يصيب ويخطأ .. والرأي اللي شايفاه انا غلط .. هو شايفه صح ومؤيد ليه شايفه صح ومؤيد لمرشح تاني شايفه غلط تقدرو تقولو رأيي صواب يحتمل الخطأ ورأي غيري خطأ يحتمل الصواب 


كل اللي قلتهم دول انا حتى وان هاجمت حد فيهم زي محمد مرسي.. انا مش بهاجم لشخصه لا سمح الله .. انا بهاجم اسلوب الادارة والتوقيت غير المناسب للي بيحصل ... بهاجم ابو الفتوح وحمدين على انهم حيلبسونا في حيطة . مش لحاجة اكتر من الغباوة على توحيدهم في مرشح واحد .. انا مش حهاجم غير الناس اللي فعلا ايديها ملوثة بدمنا .. سواء بسكوتها عن الحق طول عمرها زي عمرو موسى .. سواء باشتراكها بشكل مباشر في قتلنا زي احمد شفيق 


مافضلش من الوقت كتير .. فاضل 3 ايام .. نركز مجهودنا مش لتغيير وجه نظر حد مؤيد للمرشحين اللي فوق .. ركز على تغيير وجه نظر الناس اللي حتنتخب شفيق وموسى 
في عيلتك في صحابك في الشارع .. حتلاقي حد حينتخب دول ... مهمتنا دلوقتي مش على الفيس بوك ... مهمتنا في الناس البسيطة 


ركز على الفلول .. الله يخليك 


April 6, 2012

تضارب مصالح


ليه بنقول ماينفعش رجل أعمال يبقى رئيس ؟؟؟ لأن ببساطة حيحصل تضارب مصالح .. يعني ايه تضارب مصالح ؟؟ 
ابسطهالك يا عم .. انت عندك فرن عيش .. يقوم ايه ياسيدي يجيلك تعينيك في مصلحة التموين .. لأ ومش بس كدة .. تبقى انت الوزير ... يقوم يحصل عندك مشكلة في الدقيق .. والفرن بتاعك عمال يخسر زي أفران كتير في محافظات كتير.. اول مايجيلك افراج عن حبة دقيق .. حتوديهم فين ؟؟؟ مش لازم يكون الفرن بتاعك حياخد الدقيق كله .. بس على الاقل حتوفر للمحافظة بتاعتك نسبة محترمة من اللي جاي في الدقيق 

ده اسمه تضارب مصالح .. ماينفعش واحد يملك استثمارات .. يقوم ايه يا عم .. يمسك كمان رئيس جمهورية .. سلطة كاملة يعني ... افهموها بقى الله يخليكم 

April 4, 2012




انا مش مصدقة ومش حصدق موضوع والدة ابو اسماعيل غير لو في حكم محكمة .. غير كدة مش حمشي ورا اشاعات ... انما يتقال اصل اللي قال ده شيعي !!! .. تاني تاني حنصنف الناس حسب مذاهبهم .. وان شاء الله لما تمسكو البلد حتعملو ايه في المسيحيين ... اسم الله على السنيين يعني مابنغلطش خالص .. ولا فينا الكدابيين ولا الحرامية ولا اي اخلاق بايظة المذاهب مالهاش علاقة باخلاق الناس .. حتى لو الراجل كداب .. حيبقى هو كداب عشان هو كداب .. مش عشان هو شيعي ولا غيره
لو احنا بنفكر بالطريقة دي ... مانزعلش على اللي بيحصل في السنيين في البحرين ولا في ايران

April 1, 2012

الاعتراف بالحق فضيلة


بنبسط أوي لما بكتشف مع الوقت ان ليا آراء كتير كانو في ناس معترضين عليها وبيهاجموني.. ومع الوقت اتفقو معايا فيها 
بنبسط أكتر لما حد من صحابي يوريني حاجة غلط كنت مقتنعة بيها و يصححهالي :) 

زي ما رأيك الصواب حاجة كويسة ... اعترافك بأخطائك وتصحيحك ليها حاجة احسن 
كل ماتعيش في النور زيادة كل ماكان أفضل من ان تتمسك بأرائك لمجرد أنك مش عايز تبان غلطان 

March 29, 2012

عن انتقاد الاخوان


في ناس بتقولك انتو ليه بتنتقدو الاخوان والسلفيين .. ومابتنتقدوش البرادعي و6 ابريل و نجيب ساويرس 

عشان احنا بننتقد السلطة .. اين تكن السلطة .
في 2007 
شهر مارس .. كنت انا اللي بقول لأ للتعديلات الدستورية اللي كان بيطالب بيها مبارك 
شهر مايو .. كنت انا اللي بنتقد جماعة الاخوان حاليا .. بطالب بالافراج عن شيخ المجاهدين ابو الفتوح شوشة ربنا يرحمه . .القيادي الاخواني 
انا اللي كنت بطالب بالافراج عن خيرت الشاطر ايام ماكان معتقل 

وماشاء الله الاخوان والسلفيين في ايديهم السلطة حاليا .. وبيعملو غلطات اصخم وانيل من الحزب الوطني .... قلنا نخطو نحو الديموقراطية مع بعض واكيد حنخبط ونقع ونقوم .. انما كدة احنا مش بنقع ونقوم .. الاخوان والسلفيين حاطين الناس في الارض وبيتمشو على ضهرهم 

لو انت شخص مالكش في السياسة اصلا .. ماتزعلش لو الكلام مابيعجبكش.. دي لعبة قذرة واللي متابعها من زمان عارف كدة .. حضرتك ماتعرفش وشايف ان ده تطاول على الدين .. اتهنى بدماغك .... السياسة مافيهاش دين .. لو نفس السيناريوهات دي بتحصل من الحزب الوطني ولا الوفد ولا الكتلة المصرية .. رد فعلكم ايه .. استقيمو يرحمكم الله