كل سنة وانتم طيبين
ويارب يعدي عليكم عيد اضحى سعيد ملئ بالتفائل والامل والاشراق والبسمة وكل كلام الانشا اللي التلفزيون هارينا بيه
:(
اما بالنسبالي فانا العيد عندي بايز اساسا عشان موجة المشاريع والامتحانات
وحاليا هو مش عيد اساسا عشان الخبر اللي اتصبحت بيه النهاردة وهو اعدام صدام حسين !!
اضحية العرب
مهما عمل وفعل وانا ياما سمعت عن جبروته ومهما كنت مقتنعة ان دي نهاية مأساوية لحاكم طاغية بس ليا وقفة في ميعاد تنفيذ الحكم
سؤال؟؟
هل صدام حسين اضحية العرب للعيد السنة دي؟؟
حد يقولي لأ
ماهو ميعاد تنفيذ اعدامه ان دل فيدل على انه خروف العيد السنادي !! للدرجاتي هما بيكرهو وهما دلوقتي مبسوطين في عيدهم ان صدام حسين مات ولا ده فرمان امريكا تم توجيه لكلاب العراق لتنفيذ حكم الاعدام ويبقى العراقين هما اللي اختاره الوقت
حد يفهمني ان في مسلم النهاردة بيقضي عيده عنده السعادة التامة لتنفيذ حكم اعدام
والله لو سفاح بني مزار ماحرضى انه يتعدم النهاردة
بلاش عشان مشاعر المسلمين اللي بيعيدو رغم كل الهم اللي حواليهم
عشان اهله طيب ، يعني بجد مافيش اي دم بالمرة
في الاخر ليا كلمتين حقولهم
اولا:انا يوم التلات الموافق رابع ايام العيد مش حدخل نت خالص وده مش وقفة حداد لروح صدام لأ دي وقفة حداد على روح العرب اللي قابلة الذل وساكتة
اعتبروه اضراب عن الكتابة مثلا وعن اي تعامل بالنت
ثانيا : كلمة ااقولها لكل البشر وخاصة حكامنا العرب
(اذا دعتك قدرتك على ظلم الناس فتذكر قدرة الله عليك)
نهاية طاغية عربي في يوم عيد المسلمين 
8 comments:
سلام عليكم :
انا قلت رايى فى الموضوع دة عند عز وعندى وهاقولى تانى وعاشر ومليون
احنا اللى عملنا كدة فى نفسنا
احنا اللى سمحنالهم يضربونا على قفانا
والله انتى ما تتخيلى انا حالتى عاملة ازاى من المنظر اللى شفتة.. ومش حبا فى صدام لا والله بس علشان
اكرموا عزيز قوم ذل .. مهما كان دة مسلم عربى .. طيب اعدموة ما اعترضناش
بس مش بالطريقة المهدرة للكرامة دية
دية مهدرة للانسانية كمان مش الكرامة بس
انا ساعة ما شفت الكلام دة حسيت روحى بتتسحب منى .. حسيت هو ازاى شكلة دلوقتى قدام العالم ...
خلونا مسخة وبتسلوا بينا وللاسف احنا السبب
اما بخصوص الاضراب اللى انتى عاملاة فدة شئ جميل بس هيفيد باية ؟؟
عارفة :
احنا محتاجين شئ تانى اكبر من كدة
محتاجين حاجة من عند ربنا .. حسبى الله ونعم الوكيل
لاتعليق على الموضوع انتي عارفة حالتي عاملة ازاي
بالنسبة ليوم التلات
يكيفيني اني اضطرب مع نفسي انا ماطلبتش حد يشاركني بس اهو تعبير لذاتي وللناس اللي حواليا اني واحدة رافضة للي بيحصل ده
وبعدين لو الناس كلها اضطربت زي عن دخول النت ووصل صوتها لبلاد الصين والهند
العالم الديموقراطي المتحضر اطرش مش بيسمع ماعندهوش غير ايد ماسكة سلاح لا بيسمع ولا بيشوف ولا بيحس
ومش حقدر ااقوله اهو كله قرع زيك
لأن القرع انكسف منهم
مافيش حاجه تتقال
على رأيك مافيش حاجة تتقال
على رأي راما
اهو كله برتقااال
تصدقي ان جاتلي حالة خنقة بعد الموضوع دا يا طماطم أول يوم العيد؟ و قلت مش هدخل نت فترة لأني كنت مخنوقة جدا من كل الاستسلام دا ... المهم ربنا يوفقك يا طمطمتي في امتحاناتك... شكلك بيقول كلية عملية و انا عارفة بيتطحنوا ازاي,,, كان الله في عونك
هندسة معمارية يا علياء اهئ اهئ :((
على العموم انا كانت وجه نظري تصب في الميعاد ، اه هو يستاهل الاعدام الواحد مايقدرش ينكر بس مش في العيد دول ماحطوش اي حساب للمشاعر
ربنا على الظالم والمفتري بقى
أنسه طمطم
حلوه أنسه دى... أساسا شدى حيلك و يصبرك على البلوه اللى أنت أساسا فيها... و بعدين انا مش متفق معاكى فى جوار الأضراب ده اللى انت غالبا نفذتيه خلاص علشان الاضراب و المقاطعه ( مش بتاعه السلع )
المقاطعه للحوار مع العالم الغربى على تسميتك مش هى دى اللى هتخلينا نشد أنتباهه أو نوعيه بالعكس خطاب جاد و مباشر و عقلانى هى اللى هتخلينا نكسب بيها تأييد لقضايانا ضد أى مستعمر أو ظالم
أساسا بقى انا مش زعلان على صدام و لاعلى أعدامه فى يوم العيد.. أصل القصه و ما فيها فيلم أمريكانى بقاله تلات سنين و انا مستنى الكاست يطلع فى شاشه سودا و بعدها المواقف الخطره فى الفيلم زى أفلام زكى شان
فكك أنت من القلق على صدام و الأهانات لأننا أتهانا بما فيه الكفايه و حلنا اننا نركز على تنظيم بلدنا علشان يبقى لينا تأثير فى بلاد تانيه زى العراق و فلسطين لأن من المنطقى كده أزاى نلوم أمريكا و نطالب العالم الحر بالتدخل و أحنا أساسا عايشين عبيد
و أساسا تانى مش ملاحظه أنك بتكتبى أساساً كتير ماعلينا شدى حيلك فى الأمتحانات و ربنا يوفئك
انا بكتب اساسا كتير ..؟
احتمال برده
المهم انت ايه اخبارك بهظ بيه
وسيبك بقى من كل المواويل دي
انا عندي امتحانات ومش فاضية لسياسة
:) سلام
Post a Comment