عن انتقاد الاخوان

في ناس بتقولك انتو ليه بتنتقدو الاخوان والسلفيين .. ومابتنتقدوش البرادعي و6 ابريل و نجيب ساويرس 

عشان احنا بننتقد السلطة .. اين تكن السلطة .

في 2007 

شهر مارس .. كنت انا اللي بقول لأ للتعديلات الدستورية اللي كان بيطالب بيها مبارك 

شهر مايو .. كنت انا اللي بنتقد جماعة الاخوان حاليا .. بطالب بالافراج عن شيخ المجاهدين ابو الفتوح شوشة ربنا يرحمه . .القيادي الاخواني 

انا اللي كنت بطالب بالافراج عن خيرت الشاطر ايام ماكان معتقل 

وماشاء الله الاخوان والسلفيين في ايديهم السلطة حاليا .. وبيعملو غلطات اصخم وانيل من الحزب الوطني .... قلنا نخطو نحو الديموقراطية مع بعض واكيد حنخبط ونقع ونقوم .. انما كدة احنا مش بنقع ونقوم .. الاخوان والسلفيين حاطين الناس في الارض وبيتمشو على ضهرهم 

لو انت شخص مالكش في السياسة اصلا .. ماتزعلش لو الكلام مابيعجبكش.. دي لعبة قذرة واللي متابعها من زمان عارف كدة .. حضرتك ماتعرفش وشايف ان ده تطاول على الدين .. اتهنى بدماغك .... السياسة مافيهاش دين .. لو نفس السيناريوهات دي بتحصل من الحزب الوطني ولا الوفد ولا الكتلة المصرية .. رد فعلكم ايه .. استقيمو يرحمكم الله 

بعد مرور عام على الاستفتاء

النهاردة مرت سنة على استفتاء نعم ولا

الاستفتاء اللي اتلعب فيه على المادة التانية .. وقالت الصناديق نعم للاسلام

وقلنا وقتها واتنبح صوتنا ان الموضوع مالهوش علاقة بالاسلام وان الحكاية كلها لعبة الدستور والحكم

وان لو النتيجة كانت نعم الاخوان حيسيطرو على الحكم

بعد سنة من الاستفتاء..بعد سنة من نعم

الاخوان والسلفيين مسيطرين على حكم البرلمان .. مسيطرين على حكم لجان مجلس الشعب ..مسيطرين على 50 % من نسبة اللجنة الدستورية ..مسيطرين على ال 50 % الباقيين من اللجنة الدستورية عن طريق الانتخاب من مجلس الشعب اللي هو اصلا مسيطرين عليه .. وطامعين في الحكومة ...

لغاية دلوقتي مش عايزين يتفقو على رئيس محترم .. وعندهم على الساحة ناس أفاضل ممكن يختارو من وسطهم وهما رافضين

وبعد ماكانو بيقولو مش حندخل انتخابات الرئاسة ..جايين دلوقتي يطرحو اسم خيرت الشاطر للرئاسة

و في الاخر لما بنقول بنخلق حزب وطني جديد بيتقمصو

ولغاية دلوقتي اللي قال نعم  بيكابر وشايف ان ده اختيار الاغلبية ..اللي اتلعب عليها باسم الاسلام والاسلام برئ من كل اللي حصل ده

لا ياسيدي الفاضل انزل الشارع واتفرج على الناس حواليك ..لا اغلبهم اخوان ولا اغلبهم سلفيين ... الناس وثقفت بناس بيدّعو الاسلام

وهما ابعد مايكون عنه

-------------------------------

 بعد سنة من الاستفتاء على الدستور أسجل رأيي للزمن ... يمكن احتاجه في جدال عقيم لاحق .. عن ان ده دستور اختاره الشعب ..ولا ده دستور عملته اغلبيه احزاب سياسية

في كل قوانين العالم ..يأتي مجلسي الشعب و الشورى على اساس الدستور

فأن كتب مجلس الشعب والشورى الدستور الذي سوف ينتخب من اساسه فيما بعد ..فهو قمة العبث الدستوري

الدستور هو الذي يصنع مجلس الشعب وليس العكس

فما بالك بمجلس شعب اغلبيته من مدّعيين الاسلام ..لا خبرة سياسية ولا غيره

هل تعتقد ان مجلس الشعب لا يقف لرمز هام ديني مسيحي دقيقة حداد ..سيكتب دستورا حياديا يحترم فيه الاقليات

 هل تعتقد ان مجلس شعب يصفق لمصطفى بكري على ادعاءه للبرادعي بالعمالة بدون دليل .بمواقف مصطفى بكري المعروفة ..سيكتب دستورا حياديا لمصر .. يحترم فيه الحريات

 هل تعتقد ان مجلس الشعب يتسم اغلبيته بالجبن ..خوفا من كلمة حق في وجه سلطان جائر ..امام المجلس العسكري ..سيكتب دستورا حياديا لمصر.. يحترم فيه أمن المواطن

هل تعتقد ان مجلس شعب يتسم بالضعف ولا يتخذ اي قرارات فعلية ..سيكتب فيه دستورا في مصر ..بدون تدخل العسكر

هل تعتقد ان مجلس شعب..يرى نوابه ان اللغة الانجليزية مؤامرة خارجية ..وانه لا مانع من تزويج الفتاة بمجرد بلوغها لأي اجنبي مهما كان سنه حتى وان كان غصبا .. ان يكتب دستورا حياديا ..يحترم فيه المرأة

هل تعتقد ان مجلس شعب ..يناقش ازمة انابيب الغاز في وقت سيل الدم ..ولا ينتج اي قرارات ..لا انابيب الغاز ولا الدم ..سيكتب دستورا حياديا ..يحترم الشعب

هل تعتقد ان مجلس شعب .. يتصارع نوابه على الظهور اعلاميا وهم يستجوبون الوزراء .. ثم يجرون ورائهم طلبا للمصافحة او للاعتذار او لتسهيل ورقة ..ان يكتب دستورا حياديا لمصر

هل تعتقد ان مجلس شعب ..لا يوجد به تمثيل لشباب الثورة ... ويتناوبون على التنكيل بالقلة القليلة الموجودة منهم ..ولا يحترمونهم ..ان يكتب دستورا حياديا ..يمثل دستور مصر الثورة

وهل تعتقد ..وهل تعتقد .. وهل تعتقد

فخورة باني قلت لا للترقيع الدستور .. واسجل موقفي من هذا الدستور المنتظر وجوده تحت حكم " مدّعين الاسلام " ....ستعاني منه مصر كل المعاناة .. اسجلها للتاريخ ..لربما أحتجت هذا المقال في مجادلة عقيمة ممن لا يعترفون بالخطأ

طمطم بوجي
19/3/2012

على الأصل دور .. وان كانت أفكار :))

طب انا بجد بجد لما حد كبير في السن بيكلمني على اني هبلة وبيضحك عليا وبيستغلوني في اني بروج لأفكار عايزة توقع مصر وتوقع الجيش المصري واني اداة غبية عرفو يعملولي غسيل مخ .. بضحك !!.. اه والله بضحك !! ماهما مش مؤمنين ان ربنا خلقلنا مخ وان احنا بنفكر.. واني بمخي اقدر اجمع الاحداث اللي حواليا وأبني رأي خاص بيا سواء مع الاتجاه ده او ده .. وافقت على حكم العسكر بتجميعي لافكاري .. ماوافقتش .. انا حرة وليا رأي .. وبسمع وبقرأ وبناقش وبكون فكرة طبقا لمبادئي اللي كونتها خلال عمري القصير من قراياتي وثقافتي 

عايز تعرف الشخص اللي قدامك مضحوك عليه ولا لأ .. ارجع لخلفيته الفكرية اللي انت عارفها ... اجمع كل قرايبك اللي حواليك وحط افكارهم مع خلفياتهم وقارن وحتعرف مين بيعرف يقرر رأيه و مين بيصدق أي كلام 

لما الاقي كل اللي اعرفهم و طول عمرهم اهتماماتهم بعيدة عن القراءة وعن الاعمال التطوعية وعن النشاطات الاجتماعية .. كل اهتمامتهم محصورة داخل الاغاني والميكب وماتش الكورة وليهم رأي معين 

والاقي ناس انا عارفة ان هما من وهما اطفال اهتمامتهم وهوايتهم مثيرة للاهتمام .. وشخصيات من قبل الثورة ليها رأي .. ومابتخافش 

اقدر اعرف مين اللي بيسمع الكلام ويصدقه .. ومين بيسمع الكلام ويقلبه في مخه ويقدر يعمل ابحاث عليه و يقرر مع نفسه ايه الكلام المنطقي 

والدي / والدتي .. عمي / عمتي .. خالي / خالتي .. أستاذي / أستاذتي 

انا وإن كنت في نظركم "طفلة" في الخامسة والعشرين .. فأنا صاحبة رأي وجب احترامه .

شكر واجب

عندما يبدأ احد بالخروج من { حياتك }
شيئا فشيئا
فتأكد ان الله يخلق مساحه جديده
لشخص >> افضل << ليحل محله
فشكرا للذين خرجوا من حياتي__وشكرا لله اولا واخيراا وابدااااا

_______________________________________________

الكلمة دي صاحبتي كانت كاتباها على الفيس بوك

اد ايه جميلة ومعبرة وجواها ذكريات كتير 

فعلا شكرا لكل من خرج من حياتي ليترك مساحة لشخص افضل منه 

وبنفس المنطق 

شكرا لخروجي من حياة اي شخص .. لأترك مساحة لشخص افضل مني الف مرة لدخول حياتهم

متمنية للجميع حياه افضل واطهر وانقى وبدون طاقات سلبية

شجرة الثورة .. وفروعها

عيش ، حرية ، كرامة انسانية

_______________

ده الشعار اللي اترفع من اول الثورة

نركز بقى في الشعار ده ونبطل نلف وندور حوالين حاجة تانية

معظمنا قرا عن الثورة المضادة

في دلوقتي مواضيع مطروحة على الساحه وبشدة

الا وهي

المادة التانية ... وائل غنيم

مبدأيا بعد حوار مع صحابي حبايبي وبعد تفكير مليا

دي اخر مرة اتكلم في الموضوع ده تاني

المادة التانية

واحد : ده مش وقت الكلام فيها خالص

اتنين : ححتفظ برأي الخاص في الموضوع ده

تلاتة : ده المهم بقى .. الثورة ماكنتش بتتكلم لا في مسيحية ولا اسلامية .. امتى ظهر بقى الحوار بتاع المادة اللي حتتغير دي؟؟!!.. مش واخدين بالكم ان معادها صعب شوية .. الحمد لله المسلمين مع المسيحين ماكنش في بينهم اختلاف في وسط الميدان.. كلنا شفنا المسيحين وهما بيحمو المسلمين وهما بيصلو.. كلنا شفنا المسيحين في عظتهم والمسلمين بيامنو وراهم

ايه بقى اللي حصل فجاة!!.. مش واخدين بالكم ان ده تخطيط للتوقيع بينا تاني .. احنا في مرحلة حرجة .. اي كلام في الدين حاليا دي لعبة النار

وبردو احب اذكر ملاحظات صحابي حبايبي

كان في استفتاء في الاهرام حول المادة التانية .. اشمعنى الاهرام ... اشمعنى سرايا

وفي فيديو عن احد المنتديات الدينية وهو بيزور نتيجة الاستفتاء دي عن طريق تغير الاي بي

مش عايزين ننادي بسقوط الفساد ونقع احنا فيه عشان غرض في دماغي

ارجوكم حاولو تكونو صادقين مع نفسكم اكتر من كدة

نرجع تاني ونقول مش وقته

كمية الجروبات الغريبة لا للمادة التانية .. لا للمساس بالمادة التانية

مش قضيتنا .. ماتسيبوش الاساس وتمسكو بالافرع

خلينا كلنا نتحد زي ماكنا متحدين في 25 يناير ونقوي الاساس .. عشان نقدر يبقى عندنا الحرية ان احنا نختار صح

حنمسك في الفروع حنكسر الاساس

ركزو الله يخليكم

الموضوع التاني .. وائل غنيم

اختلفنا او اتفقنا معاه

لازم نفهمان فكرة تشخيص الثورة في وائل غنيم بيضعفها جدا

بمعنى

لو احنا مؤيدين للثورة بس شايفين ان اللي قومها وائل .. اي غلط في وائل بيتحول لا اراديا في دماغك لتشكيك في الثورة

بمعنى

الثورة مش وائل غنيم ... الثورة مش كلنا خالد سعيد

هل هو ركن من الثورة .. لأ .. تقدر تقول عليه عامل جمع الشباب

لكن الناس اللي تحت في الشارع ماكنوش الشباب بس

ناس محترمة جدا كانت مؤيده للثورة مالهاش علاقة لا بوائل ولا الفيس بوك

ركزو تاني في اساس الثورة ... سيبو الفروع لو سمحتم

تاني حنقول

عيش ، حرية ، كرامة انسانية

طيب لغاية دلوقتي احنا مشينا حسني مبارك .. حلو جدا

كلنا حاسين بالكرامة الانسانية

طيب العيش والحرية

لسة ماجوش

حيجو ازاي ؟؟

ده رأي المتواضع .. اتفقتم معه ام اختلفتم خدوه بصدر رحب

العيش

استحاله حناكل لقمة والبلد واقفة

ارجوكم .. ارجعو اشتغلو .. اعملو منكم فيكم توكيلات وابتدو اطلبو حقكم بيها .. لكن حنقف قدام المصنع عشان نزود مرتبنا .. حيجي منين ؟؟ .. ماانت موقف المصنع حيجي اساسا راتبك القليل اللي مش عاجبك منين

ماهو مافيش منتج بيتباع .. حيجي راتبك منين ؟؟ .. .البنوك قافلة .. .حتقبضو فلوسكم القليلة اللي مش عجباكم منين؟؟.

انا بردو ححطها انها لعبة من النظام ااقلبوها مظاهرات فئوية وشتتو الدنيا عشان الناس حتكره الثورة وتقولك ياريت كنا في ايام حسني

خدو بالكم .. لازم الدنيا ترجع تمشي ونلاقي انتاج عشان نعرف نلاقي العيش

الحرية

الحرية حتيجي لما نقدر نشيل امن الدولة .. لما نقدر نحط رقابية قضائية للانتخابات

نبقى مطمنين ان صوتي حقوله بكل حرية ماحدش حيقدر يمسكني ويقتلني عشانه

ابقى حر

اربي دقني.. ابني كنيستي ابقى حر

ابقى حر اقول راي من غير ماحد يقبض عليا .. ابقى حر

واحد يسرقني اقدم فيه بلاغ ومااسكتش ومااخفش .. ابقى حر

مش حعرف ابقى حر .. وانا لسة بزور استفتاءات لاغراضي الشخصية

مش حبقى حر لو حنافق عشان ماحدش يجي جنب شغلي

مش حبقى حر لو سيبنا الدنيا مولعه بينا واحنا ماسكين في مواضيع هايفة

--------------------------------

عيش ، حرية ، كرامة انسانية

--------------------------------

نحافظ على ثورتنا .. لا اسلامية ولا مسيحية ... نحافظ على ثورتنا .. نبني بلدنا ..... نحافظ على ثورتنا ... ونفضل اقوياء باتحادنا

حافظو على ثورتنا

وححاول جاهده مااتكلمش في مواضيع ممكن تثير فتنه

زي المادة التانية

حتى لو بحسن نية زي مااصحابي بيقولو

نركز حاليا في الانتخابات

الشعب ، الشورى ، الرئاسة

تكون ضامنه لحقوقنا

وتكون بموافقتنا

ماذا بعد مبارك؟

فرحنا .. انبسطنا .. حلو اوي

ممكن نفوق بقى .. احنا حققنا نص مطالبنا ..والجزء الاصعب في ثورتنا

فاكرين ثورتنا بدأت بأيه؟؟

عيش - حرية - كرامة انسانية

ماتنسوش يا جماعة مطالبنا احنا عايزين نعمل اصلاح

شيلنا راس الفساد ؟؟!!؟ شاطرين .. ده نص الطريق على فكرة مش كله ؟

انا عارفة ان ده انجاز .. بس احنا داخلين في اسبوع واحنا مازلنا مبسوطين وبنلعب .. وقت الجد على فكرة جه

فكرة بقى نتشتت في حاجات ملهاش لزمة يا ريت نتجاهلها

ده احسن طريق لمحاربتها

اهم حاجتين اخدت بالي منهم ..

وائل غنيم والحدوتة اللي وراه .. من الاخر عشان مش عايزة اتكلم في الموضوع ده كتير

الراجل مليون مرة قال هو مش بطل .. مانجيش احنا نعمله بطل بالغصب ونشكك في بطولته .. ماهو قال هو مش بطل من الاول

شاب زينا كلنا .. بيضحك مع صحابه وبيتريق وبينبسط وبيرقص وكل حاجة احنا بنعملها

فكرة الماسوني دي بتضحكني .. اللي حيكلمني فيها يكون متفرج على سلسلة القادمون كاملة من 51 حلقة على اليوتيوب ويجي يكلمني في الماسونية .. عشان يكون فهم فيها وفي لعبتها نقطة في بحر

اسألوني عليها انا في الحوارات دي من اكتر من 5 سنين في الماسونية والصهيونية واليهودية وكل الكراكيب دي

شعار الاسد متواجد بكترة جداااااااااااا واشهر حاجة في مصر منها ماركة البيجو ... فبطلو بقى .. مش معنى ان الراجل نضيف وبيلبس ماركات يبقى عميل .. الحظاظة .. دي اسورة المطاط ومشهورة وعالمية جدا .. وكل لون ليه معنى .. واللي لابسها معناه ( الحفاظ على كوكب الارض ) .. واللينك اهو rubber bracelets

 

متجوز امريكية .. نعم!! .. ماكل شباب مصر عايزين يتجوزو واحده امريكية وتكون شقرا وعنيها زرقا !!.. يطلقها عشان ترتاحو .. شغال في جوجل وجوجل مش عارف بتعمل ايه على الترجمة!!.. وهو ماله؟؟ انت موظف في شركة .. ايه علاقتك بسياسة الشركة .. يعني اروح لصاحب الشركة ااقوله انت يهودي مش حشتغل معاك .. ده على كدة نص مصر مش حتشتغل .. معظم شركات الانترناشيونال الملاك يهود !!.. اولهم بيبسي وكوكاكولا وماك وكنتاكي .. كل اللي بيشتغل فيهم عملا بقى !!

تاني حاجة .. الراجل اللي ورا عمر سليمان

تييييييييييييييييييييييييييييييييييييييييييييييييييييييييييييييييييييييييييت

كفايا اوي اوي اوي .. زودته فيها جدا ... والناس كفت ووفت صراحة في الاعتذار

طب وبعدين ؟؟

خلصنا الثورة ؟؟ .. لأ طبعا ورانا شغل كتير... مين بدأ الثورة؟؟ شباب الفيس بوك .. حلو جدا .. شباب الفيس بوك الحمد لله واعي وبدأ ينزل بنفسه ينضف الشوارع و يعمر ويحاول يحسن سلوك الناس حواليه وكل ده جميل بس احنا كدة عملنا تلات اربع ثورة فاضل ربع .. احنا موقفين البلد !!

مين موقف البلد طيب؟؟

الناس اللي كانو خايفين ولما لقو ان اسلوب التظاهر نجح وشال مبارك قالك بس نتظاهر عشان نحسن معيشتنا !!.. نعم يا بابا .. لما البلد النهاردة محتجاكم حتوقفوها؟؟.. الكلام ده كان من شهرين ماشي النهاردة نوقف الاسلوب ده ونبتدي ناخد حقنا باسلوب جديد .. عايزين ننزل نشتغل .. عايزين الحياة ترجع

طبعا انا عارفة ان الناس اللي حتقراني اغلبها مالهاش بالمواضيع دي .. طب نعمل ايه .. ننشر الكلام ده لو عاجبك .. انشر باسلوبك .. انشر في كل مكان حملة لتوعيه الناس باي حد له اهله في حاجة زي كدة يوعيهم

طب ليه ؟

اولا الثورة دي رفعتنا في الامم .. مش عايزين بردو بثورتنا ننزل تحت!!.. لازم نبني مش نهدم . الاقتصاد حيضيع مننا مش حنلاقي ناكل .. فكرة ان احنا ناخد الفلوس اللي برا ونوزعها والعيشة البمبي دي مش نافعة

الفلوس دي عقبال ماترجع وتشتغل في السوق وتجيب فوايدها.. ولا خمس سنين

ثانيا .. عندنا قطاع اسمه السياحة اتقفل تماما .. عايزين حملة للسياحة سواء داخليه او خارجية .. احنا بلد قايمة على السياحة

ثالثا .. اصلاحنا مش بيوم وليله .. ده على الاقل خمس سنين عشان نبتدي نحس.. ماتتصدموش لو لاقيتو حد يسرق ويرتشي وبيعاكس وبيرمي زباله على الارض ..احنا نحاول نصلح من نفسنا ومن اللي حوالينا وان شاء الله واحده واحده حنبقى ام الدنيا تاني

رابعا .. اللي يعرف حد يكلمه .. اللي عنده قدرة انه ينزل لحد الناس ويتفاهم معاهم ماشي.. مش عايزين كل الدنيا تقف مش حنلاقي ناكل يا بشر

رابعا .. ماتشمتوش فينا الاعادي..يعني انتو عارفين ان في اعداء للثورة دي كتير.. منهم صحابنا مثلا.. حيقولك بس.. شفتو بابا حسني كان معيشكم منغنين ازاي .. لأ احنا عايزين نثبت ان احنا احسن

اخيرا نداء لكل اللي يعرف حد يفهمه ان الاعتصامات حاليا مش صح .. احنا في ظل وجود حاكم عسكري.. لو حب يعتقلنا كلنا حيعتقلنا .. راعو المبدأ ده .. القوات المسلحة عماله تناشد الناس تساعدها...ساعدوهم يا جماعة

وربنا يوفقنا

الراي الاخر

بعتذر عن البوست ده 

كنت وعدتكم بيه لكن اوامر عليا من الحكومة بتاعتي الحبيبة 

كانت خايفة عليا الفترة دي وانا احترمت رغبتها

مبروك التنحي :)