May 20, 2009
May 21, 2008
فراق لابد منه
متهيالي كنت المفروض من الاول وانا بعرفهم اعرف اني حسيبهم ..يوم ما دخلت المنتدى وبقيت واحده منهم وبقو جزء من حياتي..اتاثرت بمعرفتهم كتير و كتبت عنهم وانا معرفش اني حيجيلي يوم اصعب منه
ناس كتير لاقيتها بتختفي ومش بقت تظهر لكن فضل ناس لسة صحاب ولسة بكلمهم وربنا يعلم كانو اخوات اد ايه...لغاية لما تيجي فجاة وتلاقي حد بيقول خلاص كدة النهاية ومافيش كلام معاهم تاني !!!! الناس دي كنت ناوية اعزمها في فرحي مش بس اكلمها شات
الفكرة ان لسة في ناس مش مقتنعه ان النت ده بيعرف ناس ببعض بجد وان صحاب كتير ظهرو منهم..
طول عمري كان نفسي اعرف ليه بنبص للنص الكوباية الفاضي ومش بنبص للنص المليان؟
العشرة صعبة ..وعشرة سنتين مش هينه ...والدمعه مش خسارة فيكم...فراقكم صعب ..بس كان لابد منه..وعلى راي مشمشتي لأجل الورد ينسقي العليق .... بس ياترى حتفتكر اللي عملته ده ؟!!؟
فراق تاني كان لابد منه ...هما اليومين دول الناس كلها بتمشي من حواليا ليه مش عارفة :( ...دفعتي بتتخرج يا جدعان..زي مافرحانه ان الناس خلصت وحتمشي ..اد مازعلانة اني مش حشوفهم تاني ..ناس كتير لو قعدت اكتب اساميهم مش حيخلصو حفتكرهم وانا معدية جنب الكلية
صعبه اوي اني ادخل السكشن تاني من غيركم...دفعة رابعة 2008 ..بتمانلكم كل الخير
March 17, 2008
في الكتاب
كتابي
فصول كتيرة مليانة حكايات وروايات
فصول عن حب وكره وود و غدر
عن اهل واصحاب وقرايب واحباب
وبتنطوي في كل وقت صفحة
صفحة مليانه دموع ومليانه ابتسامات
مليانه جراح وافراح
وبايدك يا حبيبي خطيت صفحات
تعمل بدل الكتاب روايات
بس الوقت رن وقال
وقتك يا صفحة خلاص حان
صفحة رقيقة مليانه قلوب
فضلت بتنبض بحب وشوق
دبلت وماتت وراحت مع اللي راح
صفحة جميلة بتنطوي مع الزمان
ولسة يا قلمي بتكتب في الكتاب
November 4, 2007
October 13, 2007
September 25, 2007
والله ولك وحشة
يااااااااااااااااااااااه بلوجي حبيبي نور عيني
اكتر من 4 شهور لأ فعلا كتير
طلعت قليلة الاصل معاك يا بلوجي بس والله غصب عني الصيف راح في الكورسات وماكنتش بلحق اعد على الاختراع المسمى بكمبيوتر خالص مالص
الناس اللي كنت بقابلها معاك وحشوني بجد
كنت بلاقي فيهم الصحاب اللي بتسمع وبتناقش وبتسأل على بعض
يااااااااااااااااااه مش مصدقة اني رجعت تاني على النت وحكتب من جديد
تفتكر حتبقى بداية جديدة
انا متهيألي انها بداية جديدة
فاكر يا بلوجي البداية يوم 26/ 12/2006
تفتكر عملنا حاجة
مش عارفة بس ماعتقدتش
محتاجين نتجدد من تاني محتاجين روح جديدة
تفتكر حنقدر
قول يارب
.
----------------------------
.
بداية جديدة
.
.
.
اعرفكم بنفسي مرة تانية وانا اعتقد انها حتبقى مرة اولي للي عرفوني واللي لسة حيعرفوني
مش بقلكم بداية جديدة
اسمي رضوى رضوان مشهورة بطمطم بوجي عندي 21 سنة في كلية هندسة قسم عمارة يعني تقدروا تقولو بداية معمارية شخصية مجنونة وعاقلة وعصبية جدا وباردة جدا وماحدش يسألني ازاي انا لغاية دلوقتي مااعرفش
دخلت النت وانا ناوية اوصل لأهداف معينة قدرت اوصل لبدايات فيها زي انك ممكن تبني علاقات من على النت وتبقى علاقات محترمة وكويسة سواء من جنس واحد او من الجنسين وتقدر تلاقي النقاش الهادف والمؤثر وان كل اللي كان مشاع عن النت في فترة اخر التسعينات انه عبارة عن مساوئ في بعض وان اللي بيشيت ده اكيد بيعمل حاجة غلط وياسلام بقى لو كانت بنت فدي واحدة مش محترمة وان اللي راكب موجة نت وماحدش من اهله معاه اكيد بيتفرج على مواقع مش مزبوطة وكلام كدة كنت بسمعه من العيال صحابي والناس اللي بقابلها يخليني ااقول لسة في ناس رجعين
بدايتي كانت منتديات وانا دلوقتي بقى عندي بلوج وعندي طموح اكبر من ده بس لسة عايزله وقت
.
.
يشرفني اني اتعرف بيكم تاني وححاول تبقى بداية جديدة
سلام عليكم
Subscribe to:
Posts (Atom)