تاج !!

اول البوستات تاج من عند علياء..مرسي يا عليا ..مردودالك بتاج تاني


هل كنت طالب شاطر فى المدرسة؟
مممم..والله احنا نحسبها ..ابتدائي..اولى وتانية وتالتة بتاعت السعودية وخامسة بتاعت مصر..اعدادي..هي تالتة بس اللي عديت ال90..طب الثانوي..تانية كانت 92 وثالثة 97 ..ممم المحصلة كنت شاطرة في المدرسة والعكس تماما في الكلية

ايه كانت احب مادة و اكره مادة ليك فى المدرسة و الكلية؟
المدرسة..طول عمري بيني وبين الدراسات ومدرسينها عداوة محترمة كدة..طب الكلية...ممم نقدر نقول في اعدادي الوصفية(وماحدش يسأل بكره الوصفية ودخلت عمارة ازاي!!) وفي القسم بكره حاجة اسمها ديزين ووركينج..احتمال عشان هما مواد عمارة الاساسية:( ماعلينا

كنت عايز تتطلع ايه وأنت صغير ؟
كنت بحب العب بالمكعبات اوي..اعتقد كنت نواة معمارية برده

دائما ما تطالب المرأة بالحصول على حريتها فما مفهوم الحرية عند المرأة؟
الحرية..سؤال صعب الصراحة..انا مش حتكلم عن المرأة لأن ماعنديش في قاموسي امرأة ورجل ..عندي شخصية كل بني ادم مستقله عن بقيت الناس فحتكلم عني انا
الحرية:هي ان تفعل ماتريد اجمعه مقيدا بحدود الدين والشرع والتقاليد والعادات:)) حريتي وانا حرة فيها بقى

متى احسست بنفسك "خائنة"؟
خائنة!!..زي دلوقتي كدة..لما يبقى ورايا مذاكرة وسايباها عشان اعد اعمل بوست...دي عندي خيانة للأمانة(وماحدش يسأل امانة ايه )

هل يمكن ان تحب المرأة رجلين في نفس الوقت؟ نقول الحب و ليس الاعجاب
تاني مرأة..انا حتكلم عن نفسي..لو حب يبقى اه ..انا بحب بابا جدا وبحب اخواتي الاتنين _سيبكم من العراك بس بحبهم ده اساسي_ممم ..مين كمان..صحابي الصبيان اكيد بحبهم كصحاب يعني..اما بقى حبيب القلب فده واحد مالوش تاني
شفتي كل ده ومافيش اعجاب خالص:P

إذا خذلك لعديد من المرات، هل ستستمرين معه في علاقة مستقرة؟
هو مين ده؟..حبيب القلب!!...سوري بس مش فاهمة خذلني دي يتقصد بيها ايه بجد

ماذا ترتدين فى أول لقاء لكِ مع حبيبكِ بالوصف التفصيلي؟
والله هو 3 او 4 اطقم في الدولاب ..العقل بيقول هو حيبقى واحد فيهم ..اللي هو اساسا حافظهم خلقة اكيد..الا لو ححب واحد ماشتفهوش ولا شافني..دي حالة تانية

ما هى أول فكرة ترد الى ذهنك فى اللحظات ا لأولى بعد دخولك "المحظور"...لا توجد خيارات للإجابة؟
طب ايه هو المحظور بتاعك...ايه ياربي الاسئلة اللي تشل دي

سؤال بالعربية الفصحى الى العربية الفصحى، أيعقل أن تكون هيفا وهبي المرأة العربيةمن المحيط إلى الخليج، ماذا يمكن أن تفعلن لتغيير هذه الصورة، و كيف بامكاننا أن نساعدكن ؟
ياسيدي لو حد شايفها المرأة العربية فده راجل سوري في اللفظ نص كم...انا مش بتكلم على بقيت الستات بس على الاقل الراجل ده ليه مامته واخته..طبعا اي راجل بيقرا دلوقتي حيقول وهي دي ستات دول خفر ..العيب في نظرتك مش فيهم ..موت بغيظك

إذا عجبك شاب، بتجربي تلفتيلو انتباهو، كيف؟
مش عارفة الصراحة..بس اعتقد ولا حعمل حاجة ..ياتيجي منه يامتجيش اساسا

إذا عجبك شاب وما بادلك الاعجاب، شو بتعملي؟
هو مجرد اعجاب ..طب الحمد لله ..لا متقلقيش مش حعمل حاجة ..هو مافيش غيره يعني ولا ايه

في مرشد بيقول انو البنت بترغب الشاب طالما انو بيشكل تحدي , شو رأيك؟
انا ياختي ماعرفش غير مرشد الاخوان والمرشد السياحي متعرفيش بقى هو اي مرشد فيهم اللي قال كدة

هيفاء وهبي، شادية، وفاتن حمامة: مع من تتماهين أكثر؟ بصراحة ومن دون مثاليات)؟
مع ولا واحدة...

انتقي شخصية رجالية معروفة تتمتع بالكاريزما (برأيك) وتكلمي عنها ؟
ميل جيبسون ..لأ ده معرفش اتكلم عنه بصراحة هو انا بحبه وبس:)

ونصيحةأو تعليق أرجو نشره: لما تبلشي تحكي لصاحبك عن أسماء ولادك المفترضة(لأنن بعد ما إجو وأصلاً بعد ما انفتحت سيرة زواج، إلا إذا حاطة براسك الأمومة العازبة)
صاحبي!!..طب نقو الالفاظ ..لأن انا بالنسبالي عن اصدقاء كتير اوي ..الا لو تقصدي نصفي التاني..ايوة انتي كنتي عايزة ايه اساسا من السؤال عشان مافهمتش حاجة

لماذا تنفخ المرأة في كل الزبادي كلما لسعتها الشوربة؟
عقل ستات..حنقول ايه بس

هل صحيح أن المرأة تختار الشخص غير المناسب في فترة المراهقة والشباب ثم تندب حظها بعد ذلك؟
تاني المرأة...برده انا مش بحب الكلام بوجه عام..عن نفسي لما اجرب حبقى ااقولك..ربنا يدينا بقى طول العمر

ما هو أسوأ موعد غرامي مر بك؟ وما هو أكثر جزء ضايقك في هذا الموعد؟
ماعنديش في قاموسي حاجة اسمها موعد غرامي بصراحة

لماذا تدعي اغلب النساء انهن لا يجدن الطبخ؟
انتي غيرتي من المرأة للنساء!! على العموم هما مش بيدعو هما فعلا مايعرفوش..ده على حسب معلوماتي:))

ذكرى وظروف أول قبلة ؟
قبلة!!!!!! لألأ انا من عيلة محافظة ياماما ..قال قبلة قال ..الحاجات دي بعد الجواز..الا لو تقصدي امي لما بسيتني بعد ماولدتني ..دي بصراحة مش فاكراها:)

هل تقبلين بأستمرار العلاقة التي تربطك بشخص (زوج أو عشيق في حال مات الحب بينكما؟؟
عشيق ...الفاظ نيلة ..ياربي وريني 7 ايام في اللي اخترع التاج ده
المهم..مافيش حب بيموت
احنا اللي بنموته عشان مش بنبقى عايزنه يعيش

هل يستحق الرجل التضحية بكل شيء من اجله والبدء معه بحياة جديدة تبدأين فيها من الصفر؟؟
الصفر!! يعني حننزل نشحت ولا ايه؟
لو في جيبه ااقل من عشرة جنيه من الجديدة ..مااعتقدش انه يستاهل التضحية
لو اكتر ..حفكر في الموضوع بجدية:))

هل تسعد عندما يمرر لك احدهم تاج؟
اكيد...ده انا على بال حد ياجدع

هل مقدار سعادتك أو شعورك ايا كان عند تمرير التاج لك يختلف حسب المدون
هو ده اول تاج ومن واحده بحبها وبحب مدونتها جدا..فكنت مبسوطة اني على بالها زي ماانا بفكر فيها..لكن عموما حبقى مبسوطة..الا لو التاج من امن الدولة بقى!!

هل تستمتع عند إجابتك عن أسئلة التاج؟
بص هو جزء من اظهار حقيقيتي اللي مكتبتهاش في الببروفيل...ففكرته حلوة..انك تتعرف على الشخص بالاجبار مادام ماراداش يقولل بالذوق في البروفيل:))

هل ترى للتاج أهمية حقيقية؟
انا لسة مجاوبة فوق

هل فكرت في عمل تاج خاص لك من قبل؟
حفكر جديا ..لأحسن اكتشفت ان في تيجان تشل بصراحة

هل تفضل قراءة اجوبة التاج عند المدونين الاخرين؟ أم لا تهتم سوى بالتدوينات الأخرى فقط؟
اكيد بهتم بقراية الاجوبة..منا لسة قايلة ليه فوق

عندما ترد على التاج ما الذي تراعيه اكثر؟
ان اكون على طبيعتي ورد فعلي على السؤال بحاول انقله في الاجابة

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم؟
اكيد ببقى عايزة اعرفهم اكتر..منا بقول اكيد

هل تلتزم حرفيا بأسئلة التاج؟
يعني ايه؟؟

ما هي نوعية التاجات التي تفضلها؟
نوعية!! يارب التاج ده يخلص قبل مااتشل على الكرسي

إلى من تحرص على تمرير التاج؟
للي اعرفهم!! ..ايه الذكاء الالكتروني ده؟

تمرر التاج ده لمين؟
جينا للسؤال الصعب
هو تاج نسائي بحت فالرجالة اترحمو منه الصراحة..لما نشوف مين بقى

لأ يا علياء انتي اللي بعتاه مش حتاخديه تاني

كريزي راما

هوندا

ايموس

شيكو

مانجلكمش في تاج يشل بأذن الله