واتحنطر ...!!

Lady, i'm your knight in shining armor and i love you
You have made me what i am and i am yours
My love, there's so many ways i want to say i love you
Let me hold you in my arms forever more


وانا عمالة اتمشى من كليتي للمجمع و كيني روجرز بيغني ليدي اروع اغاني الرومانسية _ودي تختلف عن ليدي بتاعت محمد سعد اوي اوي_وحالتي النفسية سيئة وفي وداني الام بي ثري وعمالة انسجم في الاغنية والاقيلكم عربية معدية من قدامي حاجة فيها بتسرسع وبتقول اركب الحنطور واتحنطر
اتحنطر!!
انا سمعت الكلمة دي وانصدمت
اتحنطر !!
مش عايزة ااقلكم اني وقفت وتقريبا فتحت بقي على اخره ، اصل مش كلمة يعني قولت اتحنطر دي
الكارثة بقى اني رجعت البيت ااقلوهم على هذا الوضع المنيل في عالم الغنا اللي احنا وصلناله
لاقيتهم عارفينها ومن زمن كمان، والادهى اخويا اللي في ستة ابتدائي حافظها
ينهار الوان مالهوش معالم
للدرجاتي وصلت اغانينا
اركب الحنطور واتحنطر!!
وجيب الجو بتاعي يركب جنبي ويتحنطر!!
وكمان بياكله بطاطا
:((
اللي يعرف طمطم حلو حيعرف اد ايه انا متقلبة في كل حاجة واني ممكن اسمع ام كلثوم وااقلب في نص الاغنية على بعرور والسمك السمك
كنوع من الهبوط بالمستوى وان الواحد لازم مايبقاش عايش فوق اوي بالذات لو انت عايش في منطقة شعبية حيبقى عيبة لو ماتعرفش الاغاني الغريبة دي
بس حرام مش لدرجة واحدة بتسرسع وفاكرة نفسها حكيم وبعرور
وبتقول اتحنطر واس
كدة بجد كتير علينا يعني اللمبي بوظ كل الاغاني وماسبش من ام كلثوم لكيني روجرز وبعرور وسعد عجبهم الاكل واشتغلو في البلح والعنب والسمك كمان
والراقصات بقو هما اللي بيغنو وبيطربونا على اخر الزمن:(
وكمان بيغنو للحمار والحنطور............:(

واه يا قفا واه يا قفا


ملحوظة صغيرة : يقال ان الاخت والاخ بتوع الحنطور منزلين فيديو كليب اهي دي كارثة تانية واتمنى من الله ان عيني ماتوقعش عليه وانا بتفرج على التلفزيون